Depýtat J. Asanov memlekettik tildi bilmeıtin qyzmetkerlerdi Qyzylordaǵa jiberýdi usynady
ASTANA. Maýsymnyń 16-sy. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda depýtat Jaqyp Asanov memlekettik qyzmetkerler úshin memlekettik tildi úıretýdiń taǵy da bir tyń ádisin engizý týraly bastama kóterdi,
dep habarlaıdy QazAqparat.
«Kez kelgen tildi úırený deńgeıiniń tıimdi ádisi - sol tildiń otanyna baryp, til úırený kýrstarynda oqyp, láj bolsa sondaı ortaǵa «qonystaný». Aǵylshyn tilin bilgisi keletinder - Anglııaǵa, Qytaı tilin bilgisi keletinder - Qytaıǵa, frantsýzshaǵa umtylatyndar - Frantsııaǵa baryp jatady. Bul jaǵdaıda til úırenýshi qalypty ortadan aıyrylyp, jergilikti turǵyndarmen kúndelikti aralasyp, solardyń tilinde sóıleýge májbúr bolady. Sonda til meńgerý úderisi ádettegiden de qarqyndy júredi. Bundaı ádis tildik ortaǵa tereń boılaý dep atalady», deı kele depýtat bundaı ádisti memlekettik tildi úırenýden maqurym qalǵan qazaqstandyq memlekettik qyzmetkerlerge qoldaný qajettigin alǵa tartady.
«Memlekettik tildiń abyroıyn arttyrý, onyń mártebesin kóterý eń aldymen memlekettik qyzmetkerlerge júktelse de, olardyń basym bóligi tilderin áli qazaqsha syndyra qoıǵan joq. Bul rette, respýblıkamyzda qazaq tili máselesi tolyǵymen sheshimin tapqan óńirler barshylyq. Máselen, Qyzylorda oblysyn alyp qarańyz. Til men mádenıettiń qaımaǵy buzylmaǵan, tildi ıgerýge talpynatyndar úshin naǵyz qolaıly orta. Sol úshin memlekettik tildi ıgerýge talpynǵandardy osy óńirge jibersek, onda til úırený kýrstaryn uıymdastyryp, qyzmetkerlerdiń otbasylyq jaǵdaıda til úırenýine jaǵdaı jasasaq utarymyz da mol», dedi J. Asanov.
Depýtat joǵaryda kóterilgen máselelerdi ilki joba retinde qarap, ony aldymen Qyzylorda oblysynda júzege asyrýdy usynady.
