Depýtat J. Álıev neke jasyn 16-ǵa deıin tómendetýdi usynady
ASTANA. 10 jeltoqsan. QazAqparat - Neke jasyn 16-ǵa deıin tómendetý kerek. Búgin Májilistiń Áleýmettik-mádenı damý komıtetinde Qazaqstannyń jastary men jasóspirimderi úshin reprodýktsııalyq densaýlyq boıynsha aqparatqa jáne qyzmetterge qoljetimdiligin qamtamasyz etý máselesin talqylaý barysynda depýtat Jumataı Álıev osylaı málim etti.
Jıyn barysynda jynystyq tárbıege qatysty aqparattyq qoljetimdilikti 16 jasqa deıin tómendetý týraly másele kóterilgen bolatyn. Alaıda, depýtat Jumataı Álıev buǵan úzildi-kesildi qarsylyq tanytty. «Ony 16-ǵa tómendetý úshin aldymen neke jasyn da 16-ǵa deıin, tipti 14 jasqa deıin tómendetelik. Sonda ǵana kelisýge bolady. Sonda ǵana biz jynystyq tárbıe týraly aıtýǵa baramyz. Áıtpese, birin kóterip, ekinshisin tómendetý tipti aqylǵa qonymsyz», - deıdi ol. Sonymen qatar, depýtat bul máselede eń aldymen shyǵys jurtshylyǵyna tán otbasy qundylyǵy aldymen nasıhattalýy kerektigin, onda da eń aldymen ulttyq mentalıtet nazarda bolýy qajettigin alǵa tartty.
«Qytaı «bir otbasy bir bala» saıasatynan bas tartyp jatyr. Ispanııa túsik jasatýǵa múldem tyıym salatyn zań jobalaýda. Al bizde she? Táýelsiz aqparattar boıynsha 3 mln. áıel túsik jasatady. Jaraıdy, jasatsyn, al odan keıingi áıeldiń bala týý qabileti saqtala ma? Másele sonda. Al biz mynadaı dúnıe engizsek, túsik jasatýdyń kókesin sonda kóremiz. Ońtústik Qazaqstan oblysynda ata-analar da muǵalimder de qarsy dep myna halyqaralyq sarapshylar ózderi aıtady. Al biz buny qabyldasaq olarǵa qaı betimizben qaraımyz? Men múldem qarsymyn», - dedi depýtat.
