Depýtat: Zeınetaqy qorynyń qarajatty qanshalyqty tıimdi ıgergenin tekserý kerek
«Memleket basshysy Qazaqstan halqyna Joldaýynda BJZQ-nyń tıimdi ınvestıtsııalyq strategııasyn ázirleýdi tapsyrdy. Búgingi tańda Ulttyq bank Qazaqstanda zeınetaqy aktıvterin senimgerlikpen basqarýshy bolyp sanalady. Ol ınvestıtsııalyq saıasatty ózi júrgizedi ári óz qyzmetin qadaǵalaýdy da ózi júzege asyrady. Zeınetaqy qorynyń aktıvteri, birinshi kezekte, qazaqstandyqtardyń óz kiristeriniń 10%-y mólsherindegi aýdarymdarynan turady. 2023 jyldan bastap olarǵa jumys berýshilerden árbir jumyskeri úshin 1,5% mólsherindegi qosymsha jarnalar qosylady», - dedi A. Jamalov Úkimet basshysy Álıhan Smaılov pen Ulttyq bank tóraǵasy Ǵalymjan Pirmatovtyń atyna joldaǵan saýalynda.
Onyń aıtýynsha, 9 qyrkúıekte QR Eńbek jáne halyqty áleýmettik qorǵaý mınıstrliginde ótken kezdesýde Qazaqstandaǵy zeınetkerlik jasty tómendetý qozǵalysynyń belsendileri BJZQ-ǵa óz narazylyqtaryn bildirdi. BJZQ jumysynyń tıimdiligine qatysty úlken qoǵamdyq narazylyq bar.
«2022 jyldyń 7 aıynda BJZQ aktıvteriniń kirisi jyldyq 9,6 paıyzdy qurady. Al jyldyq ınflıatsııa búginniń ózinde 16,1 paıyzǵa jetti. BJZQ-nyń tıimdi ınvestıtsııalyq strategııasy joq dep nyq senimmen aıtýǵa bolady. BJZQ aktıvteriniń 44 paıyzy Qarjy mınıstrliginiń oblıgatsııalaryna salynǵan jáne BJZQ-nyń negizgi kirisi qaıtadan bıýdjet esebinen qamtamasyz etiledi. Shyn máninde, olar «masyl bolyp, bıýdjetke salmaq salyp otyr», sebebi basqa quraldar boıynsha da is júzinde kiristilik joq», - dedi depýtat.
Onyń sózine qaraǵanda, Memleket basshysy óz Joldaýynda bazalyq jáne yntymaqty zeınetaqynyń ósetini týraly jarııalady. Buǵan bıýdjetten qosymsha 421 mlrd teńge bólinetin bolady. Biraq BJZQ-dan tólenetin jınaqtaýshy zeınetaqynyń mólsheri ózgergen joq.
«Bul rette 1 tamyzdaǵy jaǵdaı boıynsha BJZQ-nyń basqarýynda óte qomaqty 14 trln teńgeni quraıtyn soma bar. Bul soma Qazaqstannyń jyldyq bıýdjetine teń. Tutastaı alǵanda, BJZQ memlekettik uıym bola otyryp, jabyq ári ashyq emes qurylym bolyp qalyp otyr. Qarjygerlerdiń shaǵyn toby halyq aqshasyn óz qaltasy retinde basqarady. Іs júzinde bul uıymnyń mıllıardtaǵan kiristeri men shyǵystary Esep komıtetiniń bıýdjettik rásimderi men baqylaýynan shyǵarylǵan. Qazirgi kezde BJZQ-nyń ákimshilik shyǵystary 13 mlrd teńgege jetti. Salystyrmaly túrde aıtsaq, elimizdegi búkil áleýmettik saıasatqa jaýapty QR Eńbek jáne halyqty áleýmettik qorǵaý mınıstrliginiń jyl saıynǵy ákimshilik shyǵystary 10 mlrd teńgeden aspaıdy. BJZQ qyzmetkerleriniń eńbegine aqy tóleýge ǵana 7,9 mlrd teńge jumsaldy. BJZQ qurylymynda 1 495 adam jumys isteıdi», - dedi A. Jamalov.
Onyń paıymynsha, Esep komıteti BJZQ-nyń sońǵy jyldardaǵy shyǵystarynyń tıimdiligin tekserýi kerek.
«Úkimet jalǵyz aktsıoner retinde BJZQ-dan 211 mlrd teńge bolatyn bólinbegen paıdany dıvıdend retinde bıýdjetke aýdarýdy usynamyn. Bul qarajat áleýmettik máselelerdi, ıaǵnı 58 jasynda zeınetke shyǵý úshin eńbek ótili men jınaqtary jetkilikti áıelder sanatynyń problemalaryn sheshýge baǵyttasyn», - dedi depýtat.
Sonymen qatar, ol BJZQ-ny Úkimettiń tikeleı qaramaǵyna, ıaǵnı Eńbek jáne halyqty áleýmettik qorǵaý mınıstrliginiń basqarýyna berý týraly máseleni qarastyrýdy usyndy.
Foto: parlam.kz
