Depýtat ıAndeks servısindegi derbes derekterdiń qorǵalýyn tekserýdi surady
ASTANA. KAZINFORM — Búgin Quryltaıdyń jalpy otyrysynda depýtat Lázzat Jylqybaeva azamattardyń derbes derekterin qorǵaý jáne aqparattyq qaýipsizdikti qamtamasyz etý máselesin kóterdi. Osy oraıda ol Bas prokýror Berik Asylov pen Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıevtiń atyna saýal joldady.
— Elimizdiń jańa Konstıtýtsııasynda alǵash ret ár adamnyń jeke jáne otbasy qupııasynyń qorǵalýyna, sondaı-aq derbes dereginiń zańsyz jınalýy men paıdalanylýynan qorǵaý quqyǵyna zańmen kepildik berilgen. Bul — adamnyń quqyǵy men bostandyǵyn qorǵaýǵa baǵyttalǵan mańyzdy konstıtýtsııalyq norma. Tsıfrlyq dáýirde bul kepildiktiń mańyzy burynǵydan da arta tústi. Bárimizge málim, 11 qazan qazaqstandyqtar «ıAndeks» kompanııasynyń keıbir qyzmetterine qol jetkize almady. Kompanııa muny sheteldegi ınfraqurylymdaǵy aqaýmen túsindirdi. Mınıstrlik qazaqstandyq paıdalanýshylardyń derbes derekteri saqtalatyn serverler el aýmaǵynda ornalasqanyn málimdegenimen, keıbir komponentterdiń Qazaqstannan tys jerde ekenin rastady. Kún saıyn azamattardyń telefon nómiri, mekenjaıy, júrip-turý baǵyty men tólem derekterin óńdeıtin servıstiń sheteldegi bir aqaýdan toqtap qalýy bul derekterdiń naqty qaı elde, qandaı quqyqtyq rejımde óńdeletinin ashyq anyqtaýdy talap etedi, — dedi Lázzat Jylqybaeva.
Sonymen qatar ol azamattardyń jeke derekteriniń ashyq jarııalanýy máselesine toqtaldy. Jaqynda Qyzylorda oblysynyń Shıeli aýdanynda jeti bilim berý uıymy 529 qyzmetkerdiń derbes derekterin memlekettik satyp alý portalynda ashyq jarııalaǵan. Al Semeı qalasynda qyzmetkerlermen qatar, 344 kámeletke tolmaǵan balanyń derekteri ashyq qoljetimdi bolǵan.
— Bul derekterdi alý úshin aqparattyq júıeni buzýdyń da qajeti bolmaǵan. Olardy qorǵaýǵa tıis uıymdardyń ózderi ashyq jarııalaǵan. Sonymen qatar, árqaısymyz memlekettik qyzmet alǵanda, bankke júgingende, emhanaǵa tirkelgende, balamyzdy mektepke ornalastyrǵanda ózimiz týraly málimetterdi tapsyramyz. Biraq odan keıin ne bolady? Derekterimizdi kim qaraıdy? Qandaı maqsatta paıdalanady? Biz muny qalaı baqylaı alamyz? Ásirese, balalardyń málimetterine muqııat qaraý qajet. Balanyń turatyn jeri, oqý orny, densaýlyǵy men otbasynyń áleýmettik jaǵdaıy týraly aqparattyń taralýy onyń jeke ómirine de qaýip tóndirýi múmkin, — dedi depýtat.
Osyǵan baılanysty ol myna usynysty jarııalady:
— 11 qazandaǵy jaǵdaıǵa baılanysty derbes derekterdiń transshekaralyq berilý-berilmeý zańdylyǵyn tekserý qajet;
— áleýmettik nysandar men olarǵa qyzmet kórsetetin kompanııalardyń derbes derekterdi jınaý zańdylyǵyn tekserý kerek;
— osy jyly maýsymda zańnamaǵa jalpyǵa qoljetimdi kózderde jarııalaýǵa jatpaıtyn derbes derekterdi búrkemeleý ádisterin qoldaný talaptary engizildi. Alaıda joǵaryda aıtylǵan faktiler osy talaptardyń saqtalýyn tekserý qajettigin kórsetti;
— osy saladaǵy mamandardyń biliktiligin arttyryp, jergilikti atqarýshy organdardyń tekserý júrgizýine arnalǵan biryńǵaı ádisteme ázirleý qajet.
Aıta keteıik, jaqynda Quryltaı depýtattarynyń saýalyna jaýap bergen Premer-mınıstr Oljas Bektenov balalardyń jeke jáne tsıfrlyq derekteriniń qaýipsizdigi qalaı qamtamasyz etiletinin aıtty.
