Depýtat veterınarııa salasyna jańa tásilderdi engizýdi usyndy
«Veterınarııa júıesindegi toqyraý aýyl sharýashylyq taýar óndirýshilerdiń zardap shegýi men tabysynan qaǵylýy, mal sharýashylyǵy salasynyń ınvesttsııalyq tartymdylyǵynyń tómendeýi, bıýdjettik qarajattyń tıimsiz jumsalýy sııaqty jaǵymsyz saldarǵa ákelip soǵady. 2020 jyly nodýldik dermatıttiń taralýyna baılanysty ár túrli vaktsınalaý júrdi. Nátıjesinde mal qyrylǵan faktiler az emes. Halyqaralyq tájirıbege súıensek, Brazılııa jáne mal sharýashylyǵy damyǵan basqa da elderde aýrýdyń aldyn alý úshin - vaktsınalaý mindetti shara. Memleketten brýtsellez sııaqty asa qaýipti mal aýrýlaryn dıagnostıka jasaý úshin jáne sanıtarlyq soıýdy kompensatsııalaý úshin jylyna qanshama qarajat bólinedi. Onyń ornyna, bul qarajatty brýtsellez aýrýyna qarsy - mindetti vaktsınatsııalaýǵa jumsaǵan jaǵdaıda 2-3 jylda bul indetten tolyq qutylýǵa bolady», - dedi depýtat.
Onyń aıtýynsha, ereje boıynsha, mal tóli bir apta ishinde tirkelýi tıis. Al, tirkelmegen jaǵdaıda fermerlerge negizsiz aıyppul salý, memlekettik qoldaýdan qaǵylýǵa ákep soǵady. Mysaly, tól jónindegi málimetti mal sharýashylyǵy aqparttyq júıesi bazasyna úsh aıdan keshiktirmeı engizý múmkin emes. Óıtkeni bırkalar eń jyldam degende jaz aılarynda ǵana kelip túsedi. Mınıstrlik memlekettik satyp alý júıesine siltep, bırkalarmen ýaqtyly qamtamasyz etý boıynsha óz mindetterin oryndamaıdy.
«Mal sharýashylyǵynyń aqparattyq júıesi 10 jyl buryn ázirlengen, búginde mundaı format zaman talabyna saı emes. Blokcheıin sııaqty zamanaýı tehnologııalar bar. Onda mal ıesi elektrondy ótinim jiberedi, al veterınar kelip túsken ótinimdi tirkep qoıady. Osylaısha operatsııanyń tsıfrlyq izi belgilenedi jáne alaıaqtyqtan qorǵaıdy. Osyndaı kóp arnalylyq ádistemeni engizý qajet», - dedi Azamat Ábildaev.
Sonymen qatar ol memlekettik veterınarııalyq qyzmettiń materıaldyq-tehnıkalyq jabdyqtalýy nashar ekenin, sonyń ishinde zerthanalarda reaktıvter tabylmaı, reagentterdiń jaramdylyq merzimi talapqa saı kelmeı jatatynyn aıtty.
«Bul saladaǵy maman tapshy. Onyń bir sebebi – memlekettik veterınar dárigerlerdiń eńbek aqysy orta eseppen 70 myń teńge. Qarajattyń azdyǵy bilikti mamandardyń tapshylyǵyna, jastardyń osy mamandyqqa barýǵa yntanyń bolmaýyna ákep soǵady.
Budan bólek, mal sharýashylyǵy ónimin eksporttaý úshin jańa naryqtar ashylmaǵan. Buǵan deıin jumys istep kelgen naryqtar jabylýda. Veterınarııalyq ahýaldy jaqsartý baǵytyndaǵy jumys toqtap qalǵan», - dedi depýtat.
