Depýtat venchýrlik qorlardy kapıtalynyń bir bóligin aýyl sharýashylyǵyna bólýge mindetti etýdi usyndy
ASTANA. KAZINFORM – Májilis depýtatty Anas Baqqojaev ınnovatsııany damytý jónindegi zań jobasyn talqylaý kezinde memleketten qoldaý alatyn venchýrlik qorlardy aýyl sharýashylyǵyndaǵy jobalardy qarjylandyrýǵa mindetteýdi usyndy.
«Qalaǵa aqsha bólgen saıyn aýyldardyń bári bosady. Biz osy tujyrymdy esten shyǵarmaýymyz kerek. Qaladaǵy bıznes qanshalyqty damysa, aýyldaǵy bıznes óshe túsedi degen sóz. Qazaqstandaǵy tikeleı tendentsııa osyndaı. Qaladaǵy bızneske osylaı ár túrli qorlar arqyly aqsha beremiz, qoldaımyz, keshiremiz, al endi aýyldaǵylarǵa she? Sondaı aýyldaǵy eldi mekender bos qalýy kerek pe? Biz osyny oıdan shyǵarmaıyq, ótinish», - dedi ol.
Depýtattyń sózinshe, venchýrlik qorlar qarjy salyp júrgen jobalardyń táýekeli aýyl sharýashylyǵyndaǵy jobalardyń táýekelimen deńgeıles.
«Venchýrlik qordy táýekeli joǵary qor dep otyrsyzdar. Táýekeli joǵary jobalarǵa aqsha beredi ekensizder. Al endi fermerler aqsha surasa, táýekeli joǵary degen jeleýmen aqsha bermeıdi. Demek venchýrlik qorlarǵa talapty kúsheıtip, oǵan bólinetin aqshanyń bir bóligin aýyl sharýashylyǵyna jumsaý kerek. Salyq kodeksiniń ishinde bankterge talap qoıamyz. Qolda bar 50 trln teńgeniń bir bóligin naqty sektordyń ishinde aýyl sharýashylyǵyna bóldirtý degen talap engizsek, venchýrlik qorlarǵa da dál sondaı talap engizýimiz kerek», - dedi Májilis depýtaty.
Aıta keteıik Májilis jumysqa qabyldaǵan atalmysh zań jobasy venchýrlik qorlarǵa memleketten kórsetiletin qarjylaı qoldaýdy Bıýdjet kodeksi arqyly zańdastyrý kózdelip otyr.
