Depýtat Ulytaý oblysynda kıikti aıaýsyz atý oqıǵasyna qatysty tekseris jasaýdy surady
ASTANA. KAZINFORM – Búgin Májilistiń jalpy otyrysynda depýtat Erbolat Satybaldın kıikti zańsyz qyrý áreketterine tosqaýyl qoıýǵa qatysty másele kóterdi. Bul rette ol Ekologııa jáne tabıǵı resýrstar mınıstri Erlan Nysanbaev pen Bas prokýror Berik Asylovtyń atyna saýal joldady.
«Byltyrdan «kıiktiń sany kóbeıip ketti, eginge túsedi» degen sharýalardyń ýájin estip jatyrmyz. Sol sebepti 2024 jyldan bastap kıikti azaıtýǵa memlekttik organdardan resmı túrde ruqsat berildi. Alaıda quzyrly oryndar «azaıtý degendi» durys túsinbegen túsingen sııaqty. Taıaýda Ulytaý oblysy Jańarqa aýdany Qyzyljar aýyly «Ohotzooprom» ÓB» qyzmetkerleriniń kıik sanyn azaıtý jeleýimen býaz kıikterdi atyp jatqany jergilikti turǵyndardyń narazylyǵyn týdyrdy. Bul jerde eldiń narazylyǵy oryndy. Obal men saýapty aıyra biletin el, irgesinde bolyp jatqan mundaı sumdyqqa shydaı almaǵan. Osy rette, sóz joq, kıikterdiń popýllıatsııasyn sharýalarǵa zııan tıdirmeıtindeı, halyqty ábigerge salmaıtyndaı etip retteý qajet», - dedi E. Satybaldın.
Onyń paıymynsha, «Ohotzooprom» ÓB qyzmetkerleriniń jasaǵan bul qadamyna quziretti oryndar quqyqtyq baǵasyn berý kerek. Sebebi, atalǵan mekeme qyzmetkerleri salalyq mınıstrlik qabyldaǵan reglamentke saı jumys atqarmaǵany belgili boldy. Reglament boıynsha aqbókender aýyl mańyna 10 shaqyrym jaqyndaǵanda jaýapty mekeme qyzmetkerleri eldi dúrliktirmeı, halyqqa birinshi kezekte qulaqtandyrý, aqparattandyrý jumystaryn júrgizý kerek.
«Ekinshiden, kıiktiń popýllıatsııasyn shekteý sharalaryn oryndaý – jappaı qyrý emes. Aqbókender tabynyn sanıtarlyq retteý úshin aqsaq-toqsaǵyn, kári-qurtańyn, aýrý-syrqaýyn birinshi nysanaǵa alý kerek.
Úshinshiden, kıikti býaz kezinde azaıtý sharalaryna tyıym salý qajet. Joǵarydaǵy jaıttardy eskere kele mynadaı tıisti usynystar beremiz. QR Bas prokýratýrasy máseleniń mánin tereń qarastyryp, «Ohotzooprom» ÓB qyzmetkerleriniń is-áreketterine quqyqtyq baǵasyn berýdi talap etemiz. QR Ekologııa jáne tabıǵı resýrstar mınıstrligine kıik sanyn azaıtýǵa baǵyttalǵan sharalardy tolyq pysyqtap, tıisti reglamentke ózgerister engizýin usynamyz», - dedi depýtat.
