Depýtat Úkimetke medıtsınalyq kýálandyrýdy jekemenshik zerthanalarǵa berýdi usyndy
ASTANA. KAZINFORM – Senat depýtaty Janna Asanova mas kúıde bolǵandardy jeke zerthanalarda medıtsınalyq kýálandyrýǵa ruqsat berýdi usyndy.
Úkimet basshysynyń atyna saýal joldanǵan onyń aıtýynsha, júrgizýshilerdi medıtsınalyq kýálandyrý tek memlekettik medıtsınalyq uıymdardyń zerthanalarynda júrgiziledi. Alaıda, búginde atalǵan júıeniń múmkindigi shekteýli.
– Máselen, 2 mln-nan astam halqy bar Almaty qalasynda ne bári 2 memlekettik zerthana jumys isteıdi. Olarǵa mas kúıde bolý kúdigine ilikken tulǵalardyń bári jetkiziledi. Oryn alǵan model tym ortalyqtandyrylǵan jáne júıeli protsestik ári jemqorlyq táýekelderdi týdyrady, - dedi ol búgin Senat otyrysynda.
Senatordyń paıymynsha, balamanyń bolmaýy sarapshylardyń qorytyndysyna senimdi tómendetip, qyzmetti teris paıdalanýǵa jol ashady. Zerthanalardyń shalǵaı ornalasýy men júktemesiniń kóptigi adamnyń saǵattap protsessýaldyq jaǵdaıdyń shyrmaýynda bolýyna, al polıtsııa qyzmetkerleriniń ýaqyty men resýrsyn bosqa shyǵyndaýǵa alyp keledi. Quqyq qorǵaý júıesiniń tıimdiligi zardap shegedi.
– Azamattyń mekemeni tańdaý nemese táýelsiz qaıta tekserýden ótý múmkindigi bolmaıdy. al bul olardyń qorǵaný quqyǵyn shekteıdi. Jekelegen zerthanalardyń joǵary júktemesi men jetkilikti jaraqtanbaýy synamany alý, saqtaý jáne saraptaý ádistemesiniń buzylý, sonymen qatar materıaldardy rásimdeý barysynda protsessýaldyq qatelikter táýekelin týdyrady. Bul olardyń sottaǵy turaqtylyǵyna áser etedi, - dedi depýtat.
Onyń aıtýynsha, elimizde zamanaýı qural-jabdyqtarmen jabdyqtalǵan jáne bilikti mamandary bar jekemenshik zertahanalar jelisi jaqsy damyǵan. Osyǵan oraı Janna Asanova Úkimet basshysyna myndaı usynystar berdi:
– akkredıttelgen jekemenshik zerthanalardy paıdalaný arqyly medıtsınalyq kýálandyrý modelin engizý, olardy memlekettik zerthanalarmen birge biryńǵaı tizilimge qosý;
– olardyń qorytyndysyn akkredıtteý jáne protsessýaldyq tanýǵa jiberý tetigin bekitý, sonymen qatar azamattarǵa qaıtadan tekserýden ótý úshin zerthanamen ózdiginen tańdaý múmkindigin berý;
– bul modeldiń iske asý modelin, onyń ishinde memlekettik bıýdjetke júkteme túsirmeı qarjylandyrý máselen aıqyndaý.
Buǵan deıin ShQO-da jyl bastalǵaly 13 mas júrgizýshi ustalǵanyn jazǵanbyz.
