Depýtat UBT-ǵa daıyndalýǵa múmkindik beretin onlaın-platformany iske qosýdy usyndy
ASTANA. KAZINFORM — Ulttyq biryńǵaı testileýge daıyndalý úshin memlekettik bilim berý onlaın-portalyn iske qosý qajet. Bul týraly Májilistiń jalpy otyrysynda Úkimet basshysynyń orynbasary — Mádenıet jáne aqparat mınıstri Aıda Balaevanyń atyna saýal joldaǵan depýtat Magerram Magerramov aıtty.
— 2025 jylǵy negizgi UBT-nyń qorytyndysy boıynsha testileýge 210 myńnan astam túlek qatysqan eken. Solardyń shamamen tek 76 paıyzy shekti baldy eńsere aldy. Ortasha nátıje 140 baldan 69 ball boldy. Túlekterdiń 24 paıyzǵa jýyǵy eń tómengi shekke jete almady. Munan bólek, 711 zań buzý tirkelip, qatysýshylardyń bir bóliginiń nátıjesi joıyldy. Bul kórsetkishter túlekterdi daıyndaýda jáne mektepterdegi jalpy bilim sapasynda kúrdeli problemalardyń bar ekenin dáleldeıdi, — dedi depýtat.
Onyń aıtýynsha, mektepterdi sapaly daıyndyqqa jaǵdaı jasalmaǵandyqtan ata-analar kommertsııalyq bilim berý ortalyqtaryna júginip, qarjy shyǵyndap otyr.
— Memleket mektep júıesiniń ózinde barlyq mektep túlegi úshin UBT-ǵa daıyndalýǵa teńdeı ári ádil jaǵdaılar jasaý jaýapkershiligin ózine alýy tıis, — dedi Magerram Magerammov.
Osyǵan oraı Májilis depýtaty Úkimetke mynadaı usynystar berdi:
— mektep túlekteriniń memlekettik emtıhan kórsetkishterine saraptama júrgizip, UBT nátıjelerimen salystyrý, mektep túlekteri emtıhandary kórsetkishteriniń UBT nátıjelerimen aıtarlyqtaı aıyrmashylyq sebebin anyqtaý qajet;
— UBT-ǵa daıyndalý úshin resmı memlekettik bilim berý onlaın-portalyn iske qosý kerek;
— óńirler, mektep túrleri boıynsha bóle otyryp, UBT nátıjeleri boıynsha jan-jaqty esepti jyl saıyn jarııalaý, mektep baǵdarlamalaryn túzetý úshin ádettegi qatelikterdi túzetý qajet.
Aıta keteıik, 2026 jylǵy qańtar UBT-sy bastalǵannan beri 139 myńǵa jýyq adam testileýden ótti.