Depýtat Turlyhanovtyń uly sotqa qamaýdaǵy jazasyn aıyppulǵa aýystyrý týraly ótinish berdi

QONAEV. KAZINFORM — Májilis depýtaty Dáýlet Turlyhanovtyń uly Nurasyl Bolat ózine kesilgen jazany aıyppulǵa aýystyrý týraly sotqa ótinish bildirip, júgindi. 

— Nurasyl Bolattyń ótinishine qatysty sot otyrysy 19 maýsym kúni saǵat 14:40– ta ótedi, — dep habarlady Alataý qalalyq sotynan.

Eske sala keteıik, 2023 jyly aqpanda Nurasyl Bolat Almatyda zańger Anna Dmıtrıevıch pen onyń kúıeýi Oleg Chernovty soqqyǵa jyqqan edi. 

2023 jyldyń 9 qazanynda Almaty qalalyq áskerı sotynda zańger Anna Dmıtrıevıch pen onyń kúıeýi Oleg Chernovty soqqyǵa jyqqan Dáýlet Turlyhanovtyń uly Nurasyl Bolatqa qatysty sot úkimi shyqqan bolatyn. 

Sot úkimimen ol QK 107-babynyń 2-bóligi 1 jáne 5-tarmaqtarynda kózdelgen qylmys jasaǵany úshin kináli dep tanylyp, oǵan jaza túrinde 1 mln 700 myń teńge aıyppul taǵaıyndalǵan edi.

Keıin áleýmettik jelide Nurasyl Bolattyń túngi ýaqytta emin-erkin júrgen vıdeosy tarady. 

Byltyr qarasha aıynda Medeý aýdanynyń № 2 aýdandyq soty probatsııa qyzmetiniń Nurasyl Bolatqa qatysty jazany — bas bostandyǵyn shekteýdi odan aıyrýmen aýystyrý týraly ótinishhatyn negiz dep tanyp, ony 1 jyl 5 aı 10 kúnge bas bostandyǵynan aıyrǵan edi.