Depýtat túrli reıtıngterge sene bermeýge shaqyrdy
ASTANA. QazAqparat - Búgin Parlament Májilisinde ońaltý jáne bankrottyq rásimderdi jetildirý zań jobasynyń tanystyrylymynda depýtat Serik Qusaıynov «Doing Business» reıtıngine súıený mindetti emes degen pikir aıtty, dep habarlaıdy QazAqparat tilshisi.
«Meniń usynysym bul zań jobasynda «Doing Business» reıtıngine súıený máselesine qatysty bolyp otyr. Meniń oıymsha, osyndaı zańdarda reıtıngterdi basshylyqqa alý múldem qajet emes. Ózderińiz bilesizder, reıtıngter keı kezderde eldiń damýyna yqpal etpeıdi. Jáne ol el ekonomıkasynyń túrli baǵyttarynda jáne eldiń ómirinde keıde teris áserin beredi. Sondyqtan da biz reıtıngke emes, ekonomıkanyń jaqsarýyna negizdelýimiz kerek. Reıtıng - ol ýaqytsha kórsetkish. Osy oraıda, bul kórsetkishke negizdelmeý qajet», - dedi Serik Qusaıynov.
Atap aıtqanda, búgin Májiliste «Qazaqstan Respýblıkasynyń keıbir zańnamalyq aktilerine ońaltý jáne bankrottyq rásimderin jetildirý máseleleri boıynsha ózgerister men tolyqtyrýlar engizý týraly» zań jobasy tanystyryldy.
Zań jobasynda bankrottyq rásimderdi ótkizý merzimin qysqartý eskerilgen. Bul rette kredıtorlar jınalysynyń birqatar ókilettikterin mobıldi kredıtorlar komıtetine berý, basqarýshylardyń banktik qupııany quraıtyn málimetti alý tártibin jeńildetý, ádeıi jáne jalǵan bankrottyq úshin jaýaptylyqqa tartý tártibin ózgertý qarastyrylǵan.
