Depýtat: «Týrıstik Qamqor» qory qazaqstandyqtardy Taıaý Shyǵystan evakýatsııalaýǵa sylbyr atsalysty
ASTANA. KAZINFORM – Májilis depýtaty Serik Erýbaev Premer-mınıstr Oljas Bektenovten Irandaǵy áskerı operatsııalar kezinde Taıaý Shyǵysta qalyp qoıǵan qazaqstandyq týrısterdi elge ákelý bıýdjetke qansha shyǵyn ákelgenin surap, saýal joldady.
- Evakýatsııalanǵan 10 myńnan astam azamattyń ishinde týrısterdiń quqyqtaryn qorǵaýǵa jaýapty jáne árbir týrıstik joldamadan mindetti aýdarymdar arqyly qarjylandyrylatyn «Týrıstik Qamqor» qory tek 3 myń adamǵa qyzmet kórsetken. Saldarynan negizgi júkteme memleket pen áýe kompanııalaryna, basqa da bıznes nysandaryna tústi. Halyqaralyq jaǵdaı qazir de turaqsyz ekenin eskerip, aldaǵy ýaqytta osyndaı ózara is-qımyldyń tetikteri men hattamalaryn pysyqtaý mańyzdy dep sanaımyz. Sondyqtan atqarylǵan jumystardyń aýqymy naqtylaý úshin «Aqjol» fraktsııasy myna suraqtar tóńiregin aqparat suraıdy, - dedi ol.
Depýtat osy evakýatsııalaý operatsııasyna «Týrıstik Qamqor» qory qandaı rólde qatysqany belgisiz ekenin aıtady.
- Qazaqstan azamattarynyń qaqtyǵysy aımaǵynan evakýatsııalaý operatsııasynyń jalpy quny qandaı? Ol shyǵynnyń qansha bóligi memleket esebinen óteldi? Jeke bıznes shyǵynnyń qansha bóligin óz moınyna aldy? Ol shyǵynnyń qanshasyn memleket ótep berdi? «Týrıstik Qamqor» qory evakýatsııa kezinde qandaı qarjylyq jáne uıymdastyrýshylyq ról atqardy? - dedi Serik Erýbaev.
Eske salsaq, naýryz aıynyń basynda Taıaý Shyǵysta jaǵdaı ýshyǵyp, 10 275 Qazaqstan azamaty elge qaıtarylǵan.
