Depýtat: Tilimizdi taptaǵan Cherchesovke qaqpamyzǵa kirgen ár gol úshin 80 mln teńge tólep otyrmyz

ASTANA. KAZINFORM – Májilis depýtaty Qazybek Isa Bas prokýror Berik Asylov pen Sybaılas jemqorlyqqa qarsy agenttik tóraǵasy Asqar Jumaǵalıǵa fýtboldaǵy jemqorlyq týraly saýal joldady.

Depýtattyń aıtýnysha, 2018-2023 jyldary «Samuryq-Qazyna» aktsıonerlik qoǵamy «Astana» fýtbol klýbyna 50,1 mlrd teńge, «Barys» hokkeı klýbyna 48,8 mlrd teńge, «Astana Qazaqstan Team» velosıped klýbyna 31,5 mlrd teńge bólgen. ıAǵnı, kvazımemlekettik sektordan 4 klýbqa ǵana 6 jylda 138 mlrd teńge jumsalǵan.

«Fýtboldy damysyn dep qansha qarjy bólsek te, fýtbol emes, jemqorlyq damyp jatyr. FIFA reıtıngisi boıynsha 110-130-oryndardan asa almaı kelemiz. Al fýtboldaǵy «kelisilgen oıyndar» sany boıynsha álemdik reıtıngide 4-oryndamyz.

Tórt oıynda qaqpasyna 8 gol kirgizip, oısyraı jeńilgen, bir de bir jeńiske jetpegen fýtboldan Qazaqstan ulttyq quramasynyń bas bapkeri S.Cherchesovke bizdiń Á.Bármenqulov basqaratyn Qazaqstan fýtbol federatsııasy 640 mln tg tóleıdi deıdi. Osy 640 mln teńgeni 8 golǵa bóleıik. Sonda biz pulymyzdy maqtaıtyn, tilimizdi taptaıtyn Cherchesovke qarsylastyń emes, bizdiń ulttyq quramanyń qaqpasyna salǵyzǵan ár goly úshin 80 mıllıon teńge tólep otyrmyz», - dep kijindi depýtat.

Qazybek Isa Bas prokýratýra men Sybaılas jemqorlyqqa qarsy is-qımyl agenttigi barlyq sport federatsııasy men kásibı sport klýbtaryna revızııa júrgizý kerek dep otyr.

«Kásibı sport, fýtbol – bul negizi bıznes. Sondyqtan bıýdjetke baılanǵan fýtbol jáne basqa da kásiptik klýbtardyń barlyǵyn jekeshelendirip, memleketten qarjylandyrýdy toqtatý qajet. Memleket qarjysy balalar men jasóspirimder mektepterine, ulttyq sportqa, buqaralyq sportqa jumsalýy kerek. Osy ýaqytqa deıin memleketten jalpy sportqa, sonyń ishinde fýtbol salasyna bólingen qarjynyń esebi berilýi tıis. Óıtkeni, ol halyq qarjysy», - dedi Májilis depýtaty.