Depýtat teris dinı nasıhatqa qatysty jaýapkershilikti kúsheıtýdi usyndy
ASTANA. KAZINFORM — Búgin Májilis depýtaty Ermurat Bapı teris dinı aǵymdarǵa tosqaýyl qoıý máselesin kóterip, QR Bas prokýrory Berik Asylovtyń atyna saýal joldady.
- Búgin men bir jaǵynan azamattardyń jeke máselesi sııaqty kórinse de, qoǵamdyq turaqtylyq tuǵyryn teńseltip, ulttyq mádenı biregeılik pen elimizdiń aqparattyq qaýipsizdigine qaýip tóndirer qaterler tóńiregindegi taqyrypty qozǵamaqpyn. Sóz názik dinı dúnıeni jalbaǵaı jamylyp, eldiń ınternet áleminde halyqtyń sanasyna manıpýlıatsııa jasaıtyn «psevdodinı avtorıtetter» týrasynda bolmaq. Týrasyn qaımyqpaı aıtqanda, dúmshe dogmany tyqpalaǵan bul qarabaıyr dindarlar bizdiń ulttyq ustanymdy iritip, memleketimiz ben qoǵamnyń taǵanyn teńseltýde, - dedi E. Bapı Májilisiniń jalpy otyrysynda.
Osy oraıda depýtat ulttyq máseleni popýlızm jolynda qurban etýge qushtar jýrnalıst áriptester men mass-medıanyń basqa da ókilderin kásibı, adamı jáne azamattyq ustanymǵa berik bolýǵa shaqyrdy.
- Árbir redaktsııa men jýrnalıstiń esinde bolsyn: myńjyldyq ulttyq murattarǵa qastyq jasaýǵa, kásibı sananyń irip-shirýine jol berilmeýi tıis. Mundaı sandyraqtarǵa jol berý – zańǵa óreskel qaıshy áreket dep sanalýy kerek! Ekinshi bir keranaý kórinis – Naýryz merekesi ıslam dinine jat meıram dep jarııalaǵan saqaly bar murty joq bireýdiń vıdeo málimdemesi boldy. Áleýmettik jelilerdi kezip ketken bul daqpyrt tabıǵatpen tel týatyn merekeni joqqa shyǵarý ǵana emes, sonymen birge bizdiń halyqtyń ǵasyrlardan tamyr tartatyn salt-dástúrine, ulttyq mádenıeti men biregeıligine kúmán keltirýdiń kebi. Eldegi dinı negizdegi qoǵamdyq jarqyshaq asqynyp ketpesin desek, ákimshilik jazamen ǵana ýshyǵyp bara jatqan jaǵdaıdy aýyzdyqtaý azdyq etedi! Ásirese, áleýmettik resýrstar arqyly teris dinı nasıhat pen dinı arazdyqty qozdyrýshy tulǵalardy qylmystyq jaýapkershilikke tartýǵa múmkindik beretin zań normalaryn depýtattar korpýsynyń talqylaýyna usynýdy suraımyn. Túptep kelgende, ulttyq murat pen halyqtyq muraǵa orasan zor zalalyn tıgizetin bul problemanyń tuńǵıyǵy tereń jáne áldeqaıda qaýipti bolmaq. Eń bastysy - bul ýaǵyzshy-symaq tobyr bizdiń jas óskin urpaqty, eldiń bolashaǵyn ýlaýda. Syrttan sińgen teris dinı ýsoıqy ýaǵyz, ásirese, býyny bekimegen jastardyń saryýyz sanasyna jelimdeı jabysyp, olardy ulttyq salt-dástúr daǵdysynan aıyrýdyń aılasyn jasaýda, - dedi Ermurat Bapı.
Onyń paıymynsha, búgingi qoǵam adasý alaıaqtyǵy shylaýyna shyrmalyp, «aqparattyq terrorızm» dep ataýǵa bolatyn qııanatty qubylysqa tap boldy. Buny qoǵamdyq júıeniń qundylyqtaryn naqaq qıratý, túsinik pen túısikti teris jolǵa salý, adamdar sanasyna mańyzy ózgergen mán-maqsatty agressıvti túrde sińirý qubylysy dep qabyldaý qajet.
- Іs júzinde halyqtyq, qazaqtyq ulttyq dástúrlerge qarsy shyǵý - Qazaqstannyń konstıtýtsııalyq qurylysyna qarsy shyǵý degen sóz! «Qazaqstan - zaıyrly memleket» dep, Ata zańda atap kórsetilgen qaǵıdatqa dinı dańǵazamen qarsy shyǵý - qylmys!
Eger biz bul teris dogmaǵa búgin óte qatań jáne júıelik toıtarys bermesek, erteń tizemizdi tistelep, qapyda qalýymyz ábden múmkin. Sebebi, búginde ásirese jastardyń senim-tanymy men qoǵamdyq kózqarasy dástúrli dinniń meshitterinde emes, áleýmettik jelilerde qalyptasýda. Eger bul resýrstarda resmı ınstıtýttardyń júıeli, avtorıtetti jáne zamanaýı ustanymy tapshy bolsa, bul bos qalǵan keńistikti qarabaıyr jáne qaýipti propaganda toltyrady... Bas prokýratýra, tıisti quziretti vedomstvolar men memlekettik organdar onlaın ortadaǵy osy qıturqy qubylysty shekteý áreketine jedel kirisýi kerek, - dedi depýtat.
Aıta keteıik, jaqynda QR Bas prokýratýrasy azamattardy, onyń ishinde onlaın-platformalarda pikir bildirý kezinde zańnamany qatań saqtaýǵa shaqyrdy.
