Depýtat «Taza Qazaqstan» boıynsha turaqty shtab qurýdy usyndy
ASTANA. KAZINFORM — Májilis depýtaty Tilektes Adambekov Premer-mınıstr Oljas Bektenovke joldaǵan depýtattyq saýalynda «Taza Qazaqstan» bastamasyn ınstıtýtsıonaldyq deńgeıde damytýdy usyndy.
Depýtattyń aıtýynsha, Memleket basshysy bastamashylyq etken «Taza Qazaqstan» jobasy qoǵam tarapynan keń qoldaý taýyp, jańa ekologııalyq mádenıet pen jaýapkershilikti qalyptastyrýdyń mańyzdy quralyna aınaldy.
— «Taza Qazaqstan» qandaı da bir saıası ıdeologııa bolmasyn, barlyǵyn biriktiretin ortaq qaǵıdat, qundylyq bolý kerek, — dedi Tilektes Adambekov.
Ol barlyq saıası partııalarǵa «Taza Qazaqstan» qaǵıdatyn óz baǵdarlamalary men jarǵylaryna engizýdi usyndy.
Sondaı-aq depýtat qoǵamdy jumyldyratyn jalpyulttyq qozǵalys nemese turaqty jumys isteıtin shtab qurý qajettigin aıtty.
— «Taza Qazaqstan» ıdeıasy-qaǵıdaty qoǵamdy jumyldyra alatyn úlken áleýeti bar ıdeıa. Sondyqtan jalpyulttyq qozǵalys nemese turaqty túrde jumys jasaıtyn shtab qurý kerek, — dedi depýtat.
Budan bólek, aktsııanyń júzege asyrylýy týraly aqparat taratatyn arnaıy saıt pen tsıfrlyq platformalar ázirleý usynyldy.
Májilis depýtaty ekologııalyq sharalardy tek kóktem men kúzde emes, jyl boıy turaqty uıymdastyrý qajettigin atap ótti. Onyń pikirinshe, qoqys jınaý, tarıhı jáne tabıǵı oryndardy túrli jazýlardan tazartý sekildi jobalardy ózge maýsymdarda da ótkizý mańyzdy.
Saýalda sý resýrstaryn tıimdi paıdalaný máselesi de qozǵaldy. Depýtat aýyl sharýashylyǵy úshin jańbyr jáne erigen qar sýyn jınap, saqtaıtyn arnaıy rezervýarlar júıesin engizýdi usyndy.
Sonymen qatar eldi mekender arasyndaǵy joldardyń boıyna kópjyldyq aǵashtardan «jasyl dálizder» qalyptastyrý bastamasy aıtyldy. Onyń pikirinshe, bul qys mezgilindegi qar úıindilerin azaıtyp, joldardyń jabylý jıiligin tómendetýge múmkindik beredi.
Osyǵan deıin Oljas Bektenov «Taza Qazaqstan» aıasynda ekotýrızm men volonterlik qozǵalysty kúsheıtýdi tapsyrdy.
