Depýtat tasqynnan zardap shekkenderge kómektesýge shaqyrdy
Oblys ortalyǵynda Menovnoe, Sogra, Ablaketka, Babkına Melnıtsa, Shmelev log, Ahmer eldi mekenderi men Rabochaıa, Zavodskaıa kósheleri qarǵyn sýdan qatty zardap shegýde. Osyǵan baılanysty, «Nur Otan» partııasynyń qalalyq fılıal tóraǵasynyń orynbasary Maırash Ekibasova atalmysh aýdan turǵyndaryna kómek jınaý týraly úndeý tastady.
«Bul úndeý oblys ortalyǵynyń qaıyrymdy turǵyndaryna arnalady. Úıin sý basqan turǵyndar bizdiń kómegimizge muqtaj. Azyq-túlik pen kıim-keshek túrindegi gýmanıtarlyq kómek Kırov kóshesi, 68 úı mekenjaıynda ornalasqan qalalyq partııa fılıalynda jınalady. Baılanys telefondary: 26-73-18, 8-777-993-34-13. Qabyldaý qyzmeti saǵat 9.00-18.00 aralyǵynda jumys isteıdi» - deıdi Maırash Ekibasova.
Sońǵy úsh táýlikte taýdan qalaǵa aqqan sýdyń kólemi 25 mln tekshe metrge jetti degen resmı derek bar. Tótenshe jaǵdaı mamandary jaıylǵan sýdy aýyzdyqtaý úshin kúsheıtilgen rejimde jumys istep jatyr.
Mahovka ózeniniń mańyndaǵy úıler áli de bolsa qaýip ótinde tur. Qutqarýshylar ózenniń arnasyn bekemdeýde. Sogra aýdanyna da ondaǵan tehnıka men mamandar jumyldyryldy. Olarǵa ulttyq gvardııa jasaqtary da qol úshin sozýda.
Áýejaı aýdanyndaǵy shaǵyn bulaq ta minez kórsetip, merdiger kompanııalardyń kómegimen kóshelerdi tazalaý júrip jatyr. Al Pavlodar oblysynan keletin kómekshi top Ovechıı klıých ózenin bógeýge jumyldyrylmaq.
Tasqynnyń qarqyn alǵanyna qaramastan, qaladaǵy jylý jáne sý qubyrlary, elektr jelileri aqaýsyz jumys istep tur.