Depýtat taksı naryǵyn «kóleńkeden» shyǵarýdy usyndy
ASTANA. KAZINFORM — Qazaqstanda taksı salasynda 500 myńnan astam adam eńbek etedi, alaıda bul naryq áli kúnge deıin jetkilikti deńgeıde rettelmeı otyr. Bul týraly Májilis depýtaty Elnur Beısenbaev óziniń depýtattyq saýalynda aıtty.
Onyń aıtýynsha, qazir barlyq platformalyq qyzmet taksı júrgizýshileriniń naqty derekterin usyna almaı otyr, bul zamanaýı tsıfrlyq qoǵamda aqylǵa qonymsyz jaǵdaı. Sóıte tura, olar jyl saıyn 150 mıllıonnan astam sapar oryndaıdy.
Depýtat zańnamada áli de keńestik kezeńnen qalǵan uǵymdar qoldanylyp kele jatqanyn atap ótti, bul ıAndeks, Indraıver, Aparý jáne basqa da agregatorlardyń negizgi protsesterin aıqyn kórsetpeıdi.
— Negizinen olardyń qyzmeti «kóleńkeli aımaqta» qalyp otyr. Jaýapkershilik, qaýipsizdik standarttary, algorıtmderdiń ashyqtyǵy, saqtandyrý, jolaýshylar men júrgizýshilerdiń quqyqtaryn qorǵaý máseleleri quqyqtyq alańnan tys qalyp otyr. «Taksı júrgizýshisi» uǵymynyń naqty anyqtamasy joq. Júrgizýshi, taksopark jáne agregator arasyndaǵy jaýapkershilik, quqyqtar men mindetter naqty bólinbegen, bul taksı júrgizýshileriniń áleýmettik turǵydan qorǵalmaýyna ákelip soǵady. Taksı júrgizýshileriniń kúndelikti medıtsınalyq tekserýden ótýi týraly talap formaldy sıpatta jáne is júzinde oryndalmaıdy. Saparlar saqtandyrylmaıtyndyqtan, jolaýshylar men júrgizýshilerdiń qaýipsizdigi qalaı qamtamasyz etiletini túsiniksiz, — dedi Elnur Beısenbaev.
Sonymen birge, taksı júrgizýshilerinde júrgizýshi kýáliginiń bar-joǵy, kóliktiń tehnıkalyq baıqaýdan ótýi jáne tehnıkalyq pasporty týraly málimetterdiń shynaıylyǵy tekserilmeıdi.
— Saldarynan tapsyrystardy oryndaýǵa júrgizýshi kýáligi joq adamdar da jiberilýi múmkin, al eń qaýiptisi — qalaaralyq tas joldarda joǵary jyldamdyqpen júıtkip júrgen oń rýldi kólikter. Keıbir agregatorlar sapardyń naqty quny týraly aqparat bermeıdi. Qolma-qol aqshasyz tólem jasaý múmkindigi joq. Qolda bar tehnologııalyq múmkindikterge qaramastan, agregatorlar kólikterdiń jyldamdyǵyn, qozǵalysyn baqylamaıdy, marshrýttan aýytqýdy monıtorıng jasamaıdy, bul da jolaýshylardyń qaýipsizdigine qater tóndiredi, — deıdi depýtat.
Sondaı-aq depýtat keıbir agregatorlardyń qosymshalarynda jedel qyzmetterdi shaqyrý júıesi men klıentpen táýlik boıy baılanys ornatatyn qoldaý qyzmeti joq ekenine erekshe nazar aýdardy. Osyǵan baılanysty májilismen mynadaı sheshimderdi qabyldaýdy qajet dep sanaıdy:
Qaıtalanýdy boldyrmaý úshin aqparattyq-dıspetcherlik qyzmet pen tsıfrlyq servısterdiń fýnktsııalaryn naqty ajyratý.
«Taksı júrgizýshisi» uǵymyn zań júzinde bekitip, olardyń mártebesin, quqyqtary men mindetterin aıqyndaý. Taksı júrgizýshilerin tapsyrysty úshinshi tulǵalarǵa bermeı, jeke ózi oryndaýǵa, sondaı-aq eń tómengi sanıtarlyq talaptardy saqtaýǵa mindetteý.
Formaldy kúndelikti tekserýlerdiń ornyna mindetti turaqty medıtsınalyq tekserý engizý. Medıtsınalyq baqylaýdy Densaýlyq saqtaý mınıstrliginiń aqparattyq júıelerimen ıntegratsııalaý arqyly avtomattandyrý.
Agregatorlardy árbir sapar boıynsha jolaýshylar men júrgizýshilerdiń ómiri men densaýlyǵyn saqtandyrýdy qamtamasyz etýge mindetteý.
Jolaýshylardy sapardyń naqty quny týraly habardar etý, jyldamdyqty, qozǵalysty, marshrýttan aýytqýdy baqylaý, júrgizýshi men kólik týraly derekterdiń memlekettik derekqorlar arqyly sáıkestigin tekserý.
Eske sala ketsek, Kólik mınıstri Nurlan Saýranbaev pılotsyz taksı jobasy qalaı iske asatynyn aıtqan edi.