Depýtat T.Asanov Shubarshy aýylynda lańkestermen bolǵan atysta qaza bolǵan A. Imanbaevtyń otbasyn baspanamen qamtamsyz etý máselesin kóterdi
ASTANA. 1 aqpan. QazAqparat /Qanat Mámetqazyuly/ - Kúsh qurylymdary qyzmetkerleriniń áleýmettik qoldaýyn arttyra túsý qajet.
Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Turarbek Asanov osylaı málim etti.
«Ókinishke qaraı, ótken jyly biz elimizde alǵash ret terrorızmmen, ekstremızmmen betpe-bet kezdestik. Almatyda, Astanada, Atyraýda, Tarazda eldi dúrliktirgen oqıǵalar áli kúnge qoǵamǵa úreı týǵyzyp otyr. Bul oqıǵalardyń barlyǵynda elimizdiń kúsh qurylymdary lańkesterge naqty toıtarys berip ótti. Ókinishke qaraı, birneshe sarbazymyz erlik jasap, baqılyq boldy. Lańkestik áreketterdi saralasaq, olardyń ásirese quqyq qorǵaý organdaryna, arnaıy qyzmetterge baǵyttalǵanyn baıqaýǵa bolady. Sol arqyly lańkester qoǵamda iritki salmaq. Endeshe kúsh qurylymdarynyń materıaldyq jáne áleýmettik qoldaýyn arttyra túsý kerek», - dedi depýtat T. Asanov.
Sonymen qatar, depýtat Aqtóbe oblysynyń Shubarshy aýylynda qaıtys bolǵan Suńqar arnaıy maqsattaǵy jasaǵynyń qyzmetkeri A. Imanbaevtyń otbasyn baspanamen qamtamsyz etý máselesin kóterdi. Onyń aıtýynsha, marqumnyń artynda jubaıy men eki balasy qalǵan. «Qazirgi tańda olar Almaty qalasynda qyzmettik jataqhanada turyp jatyr», - dedi T. Asanov.
