Depýtat «Sybaǵanyń» kemshin tustaryn atady
NUR-SULTAN. QazAqparat - QR Parlament Májilisiniń depýtattary aýyl sharýashylyǵy mınıstrine saýal joldady, dep habarlaıdy QazAqparat tilshisi.
Depýtat Nurjan Áltaevtiń aıtýynsha, QR Tuńǵysh Prezıdenti Nursultan Nazarbaevtyń tapsyrmasy aıasynda shaǵyn jáne orta kásipkerlerge nesıe berýdiń «Sybaǵa» atty baǵdarlamasy daıarlanǵan bolatyn. Negizgi maqsat - mal basyn kóbeıtý.
«Sóz joq, ondaı baǵdarlama qajet. Biraq byltyr oǵan jańa talaptar engizildi. Atalǵan sharttar baǵdarlamanyń bastapqy maqsat-mindetterine qaıshy keledi jáne ony iske asyrýǵa kedergi jasap otyr. Birinshiden, iri qara mal tek shetelden ǵana jetkizilýi shart. Shaǵyn jáne orta kásiporyndar úshin bul - tym aýyr talap. Sebebi kóp qarjy ketedi. Onymen baǵdarlama arqyly shaǵyn jáne orta bıznesti qoldaý múmkin emes. Sharýashylyqtar shetelden maldy tasymaldaý sharalaryna kóp shyǵyndalady. Kedendik jáne salyqtyq shyǵyndar bar. Oǵan qosa, shetelden ákelingen maldy úsh aı boıy karantındik aımaqta ustaý qajet. Ondaıda fermer árbir kúnge aqsha tóleıdi», - dedi N.Áltaev búgingi plenarlyq otyrysta.
Onyń sózine qaraǵanda, asyl tuqymdy maldy respýblıkanyń ishinde satyp alýǵa ruqsat joq. Alaıda Qazaqstanda ondaı sharýashylyqtar az emes. Sonyń barlyǵyna bıýdjetten qyrýar qarajat bólingen bolatyn. Respýblıka boıynsha 1 044 asyl tuqymdy mal basyn kóbeıtýge 47 mıllıard teńge jumsaldy. Atalǵan sharýashylyqtarda 300 myńnan astam asyl tuqymdy mal bar. «Biraq sonyń barlyǵyn «Sybaǵa» baǵdarlamasy aıasynda satyp alýǵa ruqsat joq. Bylaısha aıtqanda, ózimizde turǵan asyl tuqymdy maldy baǵdarlama aıasynda satyp ala almaımyz. Sonda ol sharýashylyqty ne úshin qurdyq? Qyrýar bıýdjet qarajatyn ne úshin jumsadyq? Qazirgi kezde sharýalar ózimizdegi asyl tuqymdy maldy soıyp, etke tapsyra bastady. Basqa amal qalmady», - dep atap kórsetti N.Áltaev.
Osyǵan baılanysty bir top depýtattar «Sybaǵa» baǵdarlamasy aıasynda ózimizdegi asyl tuqymdy maldy satyp alýǵa ruqsat berý qajet dep sanaıdy.
