Depýtat statıstıka salasyndaǵy kemshilikti atady
ASTANA. KAZINFORM — Resmı jáne vedomstvolyq statıstıka bir-birine qaıshy keletin jaǵdaılar jıi kezdesedi. Bul týraly Májilis depýtaty Tatıana Saveleva málim etti.
— Jalpy sıpattaǵy transfertterdi esepteýdiń jańa ádistemesin engizýdegi negizgi máseleniń biri — barlyq esepteýler negiz bolatyn senimdi statıstıkalyq bazanyń joqtyǵy. Resmı jáne vedomstvolyq statıstıka biriktirilmegen jáne bir-birine jıi qaıshy kelip jatady. Negizgi kórsetkishter — jumyssyzdyq deńgeıi, tutyný baǵalarynyń ındeksi, ómir sapasynyń ındeksi qysqartylǵan jáne ádisnamalyq turǵydan burmalanǵan. Sondyqtan basty baǵdar beretin qyzmetin tıisti deńgeıde atqarmaı otyr, — dedi T. Saveleva Parlament Májilisinde jalpy sıpattaǵy transfert taqyrybyna arnalǵan Úkimet saǵatynda.
Osy oraıda ol elimizdegi mal sanynyń statıstıkasyna qatysty kemshilikterdi eske saldy.
— Naqty mysal retinde aýyl sharýashylyǵynyń statıstıkasyn keltirýge bolady. 5 mıllıonǵa jýyq mal basy týraly derektiń burmalanǵanyn arnaıy komıssııa Memleket basshysy kótergen máseleden keıin áshkereledi. Bul jaǵdaı memlekettik saıasatty josparlaý jáne baǵalaý kezinde paıdalanylatyn derekterdi qalyptastyrý tásilderin qaıta qaraý qajet ekenin baıqatyp otyr, — dedi depýtat.
Onyń paıymynsha, shynaıy emes statıstıka naqty transfertterdiń qalyptasýyna tikeleı kedergi keltiredi. Bul turǵyda ómir súrý deńgeıiniń tómendetilgen kórsetkishi jetkiliksiz qarjylandyrýǵa ákeledi.
— Úkimet saǵatyna daıyndyq barysynda bul másele Joǵary aýdıtorlyq palatamen (JAP) bólek talqylandy. Májilistiń Qarjy jáne bıýdjet komıteti statıstıkalyq derekter bazasyn qalyptastyrý ádistemelerin qaıta qaraý, sondaı-aq qarapaıym esep berý statıstıkasynan tsıfrlyq quraldar men derekterdi basqarýdyń zamanaýı tásilderine negizdelgen analıtıkaǵa kóshý qajettigi týraly JAP usynysyn tolyǵymen qoldaıdy, — dedi Tatıana Saveleva.
Eske salsaq, byltyr kúzde Qazaqstanda mal sany ǵana emes, qus sany da qoldan kóbeıtilip kelgenin jazǵan edik.
Budan buryn habarlanǵandaı, Parlament Májilisinde «Jalpy sıpattaǵy transfertterdi aıqyndaý jónindegi jańa tásilder» taqyrybynda Úkimet saǵaty ótip jatyr.