Depýtat: SQO-nyń 13 myń turǵyny radıatsııalyq qaýipti aýmaqta turyp jatyr
ASTANA. QazAqparat - Parlament Májilisiniń depýtaty Qanat Mýsın SQO-daǵy eki aýdanǵa radıatsııalyq qaýip týdyryp turǵanyn aıtty, dep habarlaıdy «QazAqparat» HAA tilshisi.
«Qazaqstan ýran qory boıynsha Aýstralııadan keıingi ekinshi memleket sanalady. Qazaqstandyq ýran kontsentraty álemdik atom energetıkasynyń 40 paıyzdyq qajettiligin qamtamasyz etip, AES-y bar álemniń búkil memleketterine tasymaldanady. Radıoaktıvti shıkizattyń strategııalyq qorynyń bolýy memleketimizdiń jeke qaýipsizdigin qamtamasyz etýde erekshe mindetteme júkteıdi. Biraq, keıbir jaǵdaılar qolǵa alynǵan sharalardyń jetispeıtindigin kórsetip otyr», - deıdi depýtat Premer-Mınıstrdiń atyna joldaǵan depýtattyq saýalynda.
Onyń aıtýynsha, SQO-daǵy Aıyrtaý men Ǵabıt Músirepov aýdandarynda áleýetti radıoaktıvti qaınar kóz bolyp tabylatyn jumysy toqtatylǵan ónerkásiptik ýran ken ornynyń aýmaǵy bar. 2001-2006 jyldar aralyǵynda ol aýmaqtardyń kontservatsııasy úshin 250 mln teńge jumsalǵan.
«2015 jyly júrgizilgen prokýratýranyń tekserý jumystary SQO-da atalǵan konservatsııa aýmaqtary zańnama talaptaryna saı kelmeıtinin, al radıoaktıvti núkteler halyqtyń ómiri men densaýlyǵyna qaýip týdyratynyn kórsetken. Gamma-sáýlelenýdiń mólsheri ruqsat etilgen deńgeıden 2 esege asyp ketken. 2016 jyldyń 2 aqpanynda prokýratýra QR Energetıka mınıstrligine atalǵan buzýshylyqty joıýdy tapsyrdy. Máseleniń ózektiligine qaramastan, 2016 jyldyń maýsym aıynda Energetıka mınıstrligi formaldy túrde ǵana sharalardy qolǵa aldy», - deıdi depýtat.
Qanat Mýsınniń sózine sensek, Energetıka mınıstrligi SQO ákimdigine jergilikti bıýdjettiń esebinen ken ornyna qosymsha konservatsııa júrgizýdi usynǵan.
«Biraq, mınıstrlik bul máseleni sheshý oblys ákimdiginiń mindeti emes ekenin bilmedi deıtin emes. Birqatar sharalar bastaý alǵanymen másele sol kúıi sheshilmeı qalǵan. Al bul ýaqytta ýran keniniń 30 shaqyrymdyq radıýsynda 6 eldi mekende 13 myń adam turyp jatyr», - deıdi Mýsın.
Depýtat SQO ólim-jitim kórsetkishi boıynsha respýblıkada aldyńǵy qatarda, ómir súrý uzaqtyǵy ol oblysta tómen ekenin, aýrý-syrqaýǵa shaldyǵý deńgeıinde óńir 5 orynda turǵanyn jasyrmaı aıtty.
«Halyqty radıatsııalyq qaýipten qorǵaý týraly» zań boıynsha ol jerdegi halyq qorǵalýy kerek. Osy sebepti SQO-daǵy osy másele boıynsha naqty sharalardy qolǵa alýdy suraımyz. Ol jerge tekserý júrgizý kerek», - dep túıdi májilismen.
