Depýtat Shymkent úshin «7-20-25» baǵdarlamasy boıynsha ıpotekalyq zaım shegin arttyrýdy usyndy
«Aq jol» fraktsııasynyń depýtattary Shymkenttiń respýblıkalyq mártebesin eskere otyryp, «7-20-25» baǵdarlamasy boıynsha ıpotekalyq zaım shegin 15-ten 25 mıllıonǵa deıin arttyrýdy suraıdy. Birqatar óńirde baǵdarlamanyń sharttary olardyń erekshelikterine saı kelmeıdi. Máselen, halyq eń tyǵyz qonystanǵan Túrkistan oblysy men Shymkent. Bul jaqta kópbalaly otbasylar kóp jáne olar úshin bir, eki bólmeli páterler tarlyq etedi. Al baǵdarlama sharty boıynsha baspana quny 15 mln teńgemen shektelgen. Shymkentte mundaı somaǵa tek 2 bólmeli páter ǵana alýǵa bolady. Al bes balasy bar otbasy mundaı páterde qalaı ómir súredi? Taıaýda ǵana Shymkent megapolıs dep jarııalandy ǵoı», - dedi Berik Dúısembınov QR Ulttyq bank basshysyna joldaǵan saýalynda.
Depýtat atalǵan turǵyn úı baǵdarlamasy boıynsha páter alýǵa júgingen qazaqstandyqtardyń da qatary tym az ekendigin atap ótti. Máselen, Ulttyq bank pen «Baspana» ıpotekalyq kompanııasynyń dereginshe, 29 tamyzdaǵy jaǵdaı boıynsha baǵdarlamaǵa qatysýǵa 1803 ótinish tirkelip, onyń 1190-y maquldanǵan.
«Bul baspana kezeginde turǵan 1,5 mıllıon adamnyń jáne jer telimin alý kezeginde turǵan 1 mln adamnyń 1 paıyzy da bolmaıdy. Aıtalyq, Túrkistan men Mańǵystaý oblystarynda - 0, SQO - 1, Atyraý - 1, Pavlodar - 9, Jambyl oblysynda 10 ótinim ǵana túsken. Árıne, mundaı kórsetkish jaqsarta túsýdi qajet etedi», - dedi ol.
Onyń paııymynsha, mundaı jaǵdaıdyń oryn alýyna jergilikti atqarýshy organdardyń da kinási basym.
«21 ǵasyrda bastama jasap shaqyryp, qońyraý shalýǵa bolmaı ma? Tym bolmaǵanda 1 paıyzy qatyssa, 1 myń emes 25 myń adamdy baspanamen qamtýǵa bolar edi», - dedi Berik Dúısembınov.
