Depýtat: Іshki tuşy sý qorlaryn saqtaý — ulttyq qaýipsizdik máselesi
ASTANA. KAZINFORM — 2040 jylǵa qaraı sý tapshylyǵy 17,5 tekshe shaqyrymǵa jetýi múmkin.
Bul jóninde Parlament Májilisiniń depýtaty Edil Jańbyrshın Ekologııa máseleleri jáne tabıǵatty paıdalaný komıtetiniń «Kókjıde qumdy alqabynyń aýmaǵyndaǵy geoekologııalyq jáne gıdrogeologııalyq zertteýler» taqyrybyndaǵy otyrysynda málimdedi.
— Kókjıde máselesi talaı jyldan beri kóterilip kele jatyr. Ótken ǵasyrdyń 80-jyldarynan bastap iri tuşy jerasty sý qory retinde belgilengen. Búginde onyń sýy birqatar eldi mekendi qamtamasyz etý úshin paıdalanylyp otyr. Bolashaqta batys Qazaqstan óńirlerin aýyz sýmen qamtýdyń mańyzdy kózderiniń biri retinde qarastyrylyp otyr. Alaıda osy aýmaqta munaı óndirý jumystary júrgizilip jatyr. Sondyqtan jerasty sýlarynyń sapasyn saqtaý máselesi qoǵamdy kóp jyldan beri alańdatyp otyr, — dedi ol.
Depýtattyń sózinshe, búginde bul máseleniń mańyzy arta tústi. Memleket basshysy sýdyń strategııalyq resýrs ekenin birneshe ret atap ótip, sý resýrstaryn basqarý júıesin tsıfrlandyrýdy, olardy paıdalaný men qorǵaýdy baqylaýdy kúsheıtýdi tapsyrdy.
— Halyqaralyq uıymdardyń málimetine sáıkes, Qazaqstan sý tapshylyǵy qaýpi joǵary elderdiń qataryna jatady. Eldegi sý resýrstarynyń shamamen 45-48%-y shekaralas memleketter aýmaǵynda qalyptasady. Al 2040 jylǵa qaraı sý tapshylyǵy 17,5 tekshe shaqyrymǵa jetýi múmkin. Osyndaı jaǵdaıda ishki tuşy sý qorlaryn saqtaý ulttyq qaýipsizdik máselesine aınalyp otyr, — dedi Edil Jańbyrshın.
Aıta keteıik, buǵan deıin barlyq kásiporyn sý únemdeýdiń bes jyldyq josparyn ázirleýge mindetteletinin jazǵanbyz.
