Depýtat ishki týrızm týraly: Joldar jupyny, servıstik qyzmet joq
ASTANA. KAZINFORM – Májilis depýtaty Qaırat Balabıev otandyq týrızmniń damýyn synǵa aldy.
«Týrızm – álemdik ekonomıkada qarqyndy ári tabysty bıznestiń biri. Tek týrızmniń arqasynda paıdaǵa kenelgen elder bar. Al, Qazaqstannyń týrızmi – joldary jupyny, jaryǵy men baılanysy, servıstik qyzmeti joq. Sonyń kesirinen tamasha tabıǵattyń ıgiligin kóre almaı kelemiz. Ózge elder qos qabatty avtobýs, qolaıly taksı, laınermen krýız jasatyp jatqanda, bizde dala turmaq, qalalardyń ózi jańa avtobýstarǵa jarymaı jatyr. Avtoparkter de ábden eskirgen», - dedi Qaırat Balabıev depýtattyq saýalyn Premer-Mınıstrdiń birinshi orynbasary Roman Sklıarǵa joldaı otyryp.
Onyń aıtýynsha, jolaýshy tasymaldaıtyn avtobýstardyń 66% tozyǵy jetip, qyzmet etý merzimi ótken.
«Týrızm damyǵan Almaty men Túrkistan qalasy jáne oblys ortalyqtarynda jańa avtobýstar tapshy. Jeke kólik emes, kópshilikke arnalǵan avtobýs bolǵandyqtan ábden eskirgeni tasymal sapasyna, qaýipsizdikke tikeleı áser etedi, al, olardan shyǵatyn gaz aýaǵa zııan. Eskirgen avtobýstarmen týrısterdi tasymaldaý uıat emes pe? Joldardyń sıqy syn kótermeıdi. Shetelden kelgen qonaqtarǵa joǵarǵy deńgeıde qyzmet kórsetip, barynsha qolaıly jaǵdaı jasaǵanda ǵana eldegi týrızmniń damýyna jol ashylyp, sheteldikterdi tarta alamyz», - deıdi ol.
Depýtat keltirgen málimetke sáıkes, 2023 jyly el aýmaǵyndaǵy 7 zaýyt nebári 3200 myń avtobýs shyǵarǵan, al jalpy avtobýs parkindegi jańa avtobýstardyń úlesi 7,4%.
«Sondaı-aq, bul salaǵa memleket pen kásipkerler tarapynan ınvestıtsııalar jetispeıdi. Al, kásipkerlerge avtobýstardy syrttan satyp ákelý tıimdi emes, óıtkeni, alym men kólikti bastapqy tirkeýden ótkizý rásimi ımporttyq avtobýstar úshin óte qymbat. Tek avtobýs emes, jeńil kólikterdiń kedendik rásimderi, túrli alym- salymdary jalpy kólik baǵasyn 2-3 ese óskeni jasyryn emes. Joǵaryda aıtylǵan mańyzdy máselelerdi eskere otyryp, Qazaqstandaǵy týrızmniń damýyna tikeleı áserin tıgizetin otandyq avtobýs parkin jańartý men ishki suranysty qamtamasyz etý maqsatynda, qurmetti Roman Vasılevıch, sizden basqa memleketterden ákelinetin jańa avtobýstardy qaıta óńdeý jınaǵy men kólikti bastapqy tirkelýden bosatý týraly sharalardy qarastyrýlaryńyzdy suraımyn», - dep qorytyndylady Qaırat Balabıev.