Depýtat Shymkenttegi mamandandyrylǵan halyqqa qyzmet kórsetý ortalyǵynda boldy
ASTANA. KAZINFORM - Májilis depýtaty, «AMANAT» partııasy fraktsııasynyń múshesi Bolatbek Najmetdınuly Shymkent qalasyndaǵy №2 mamandandyrylǵan halyqqa qyzmet kórsetý ortalyǵyna bardy. Májilismen ortalyq jumysymen tanysyp, ujymmen kólik ıelerine qyzmet kórsetýdiń ózekti máselelerin talqylady.
Shymkent qalasyndaǵy ortalyq kúnine 300-ge jýyq adamǵa qyzmet kórsetedi. Bıyl 35 myńnan astam memlekettik qyzmet kórsetip, 12 myńǵa jýyq júrgizýshi kýáligin bergen. Avtodrom joldarymen jabdyqtalǵan ortalyqta azamattar júrgizýshi kýáligin alý úshin teorııalyq jáne praktıkalyq emtıhandar tapsyrady, sonymen qatar medıtsınalyq tekserýden ótip, kóligin qaıta tirkeı alady.
– Eki jyl buryn bizdiń halyqqa qyzmet kórsetý ortalyǵyndaǵy adamdardyń uzyn-sonar kezegi kópke málim boldy. Tipti, keıbireýler kezekke turý úshin qorshaýdyń ústinen sekirip jatty. Bul keleńsiz jaıt Túrkistan oblysynan kelgen azamattardyń kóp bolýynan oryn aldy, keıin ol jaqta halyqqa qyzmet kórsetý ortalyǵy ashyldy. Biraq qazirgi ýaqytta kezek azaıǵan joq. Mekemede kompıýterler jetkilikti sekildi, degenmen áli de qaǵazbastylyq máselesi bar, – dedi Shymkent qalasynyń turǵyny Aıdos Ábdirazaq.
Májilis depýtaty Bolatbek Najmetdınuly kólik ıeleri men HQO qyzmetkerleriniń máseleleri men usynystaryn tyńdady. Ol halyqqa sapaly ári qoljetimdi qyzmet kórsetýdiń mańyzdylyǵyna toqtaldy.
– Halyq jalpy memlekettiń jumysyn halyqqa qyzmet kórsetý ortalyqtary jumysynyń sapasyna qarap baǵalaıdy. Qyzmetkerlerdiń yntasyn jáne kadrlyq áleýetin arttyrý úshin sońǵy eki jylda respýblıka boıynsha halyqqa qyzmet kórsetý ortalyqtary qyzmetkerleriniń eńbekaqysy 100 paıyzǵa kóterildi. Biz mamandardyń eńbek jaǵdaıyn jaqsartýdy jalǵastyra beremiz, biraq olardyń da jumys deńgeıine qoıylatyn talaptar artyp keledi. Partııamyzdyń «Halyqpen birge!» saılaýaldy baǵdarlamasynda memleket, qoǵam jáne azamat arasyndaǵy qarym-qatynasty barynsha tsıfrlandyrýdyń, qyzmetter alýdyń barlyq satysynan adam faktoryn alyp tastaýdyń mańyzdylyǵy erekshe atap ótildi, – dedi depýtat.
Bolatbek Najmetdınuly daıyn qujattardy berý sektorynyń, operatsııalyq zaldyń, avtodromnyń jáne basqa da bólimderdiń jumysymen tanysty. Kezdesý sońynda depýtat týyndaǵan máselelerdi sheshýge, onyń ishinde mamandandyrylǵan halyqqa qyzmet kórsetý ortalyqtarynyń balansynda turǵan avtodromdardy qarjylandyrýǵa qatysty qajetti qoldaý kórsetýge yqpal etetinin aıtty.
Eske sala keteıik, 2023 jyldyń sońynda Memleket basshysy Qasym-Jomart Toqaev «Azamattarǵa arnalǵan úkimet» memlekettik korporatsııasynyń máseleleri týraly zańǵa qol qoıǵan bolatyn. Depýtattar bastamashy bolǵan zań azamattardyń jeke derekterine qol jetkize alatyn halyqqa qyzmet kórsetý ortalyqtarynyń qyzmetkerlerine tıisti jaýapkershilik deńgeıin qamtamasyz etedi, jasyryn memlekettik qyzmetterdi anyqtaý mehanızmin engizedi, sondaı-aq azamattarǵa qosymsha qyzmetterdi kórsetýge múmkindik beredi.
