Depýtat: «Shıqyldaǵan tildegi» mýltfılmge tyıym salý kerek
ASTANA. QazAqparat - Balalarǵa durys tárbıe bere almaıtyn mýltfılmderge tyıym salý qajet. Bundaı pikirdi Parlament Májilisinde balanyń damýyna zardap tıgizetin aqparattan qorǵaýdy kózdeıtin zań jobasynyń tanystyrylymy barysynda Berik Dúısenbınov aıtty, dep habarlaıdy QazAqpart.
«Teledıdardan 24 saǵat boıy «shıqyldaǵan tilde» mýltfılm kórsetedi. Balalarymyzdyń tili osy qulaqqa jaǵymsyz tilde «shıqyldap» shyǵyp kele jatyr. Bul ne qazaqtyń, ne orystyń tili emes, ıaǵnı mýltfılmniń tili. Jalpy, osy baǵytta tıisti shekteýler bola ma?»,-dedi depýtat.
Sonymen qatar Berik Dúısenbınov balalardyń damýyna zııan keltiretin kompıýterlik oıyndarǵa tyıym salý kerektigin atap ótti.
«Bul oıyndardyń fılosofııasynyń ózi baladan bólek, eresek adamdy shoshytady», - dedi depýtat.
Aıta keteıik, Májiliste «Balalardy densaýlyǵy men damýyna zardabyn tıgizetin aqparattan qorǵaý týraly» jáne «Qazaqstan Respýblıkasynyń keıbir zańnamalyq aktilerine balalardyń densaýlyǵy men damýyna zardabyn tıgizetin aqparattan qorǵaý máseleleri boıynsha ózgertý men tolyqtyrýlar engizý týraly» zań jobalary tanystyryldy.
«Osy zań jobalaryna Parlamenttiń bir top depýtaty bastamashylyq etti. Zańnamanyń dıdary ózgerdi, damý qarqyny alapat. Aqparattyń tasqyny kezeńinde onyń zardabynan balalardy, jas urpaqty qorǵaýdyń mańyzdylyǵy kún tártibine shyǵyp otyr», - dedi Májilis depýtaty Bekbolat Tileýhan tanystyrylym barysynda.
«Zań jobasynyń mindeti balalardy fızıkalyq jáne psıhıkalyq densaýlyǵyna, ımandylyq, rýhanı, psıhıkalyq, fızıkalyq jáne áleýmettik jaǵynan damýyna zardabyn tıgizetin aqparattan, onyń ishinde zorlyq-zombylyq pen qatygezdikti, pornografııany, qoǵamǵa jat ári quqyq buzýshylyq áreketti nasıhattaıtyn baspa, dybys pen beıne ónimderin, elektrondyq jáne kompıýterlik oıyndardy taratýdan qorǵaýdyń uıymdastyrýshylyq-quqyqtyq tetikteri men zańnamalyq kepildikterin engizý bolyp tabylady. Osy oraıda álemniń jetekshi elderiniń tájirıbesi eskerilip otyr», - dep naqtylady B.Tileýhan.
