Depýtat sheteldik tájirıbe týraly: «Sem aǵa» bizge qalaı aqyl úıretpeýi kerek

ASTANA. QazAqparat - Qanaty bekigen Qazaqstan zań qabyldaýda sheteldik memleketterdiń tájirıbesine aıtarlyqtaı zárý emes. Parlament Májilisiniń depýtaty Vladıslav Kosarev Májiliste statıstıka týraly zań jobasynyń tanystyrylymynda osylaı dedi, dep habarlaıdy «QazAqparat» HAA tilshisi.

Búgin Parlament Májilisiniń otyrysynda QR Ulttyq ekonomıka birinshi vıtse-mınıstri Rýslan Dálenov májilismenderge «QR keıbir zańnamalyq aktilerine memlekettik statıstıka máseleleri boıynsha ózgerister men tolyqtyrýlar engizý týraly» jańa zań jobasyn tanystyrdy. Vıtse-mınıstr zań jobasyn daıyndaý kezinde Germanııa, Fınlıandııa, Ońtústik Koreıa, Avstrııa, Italııa sekildi damyǵan elderdiń tájirıbesi zerdelengenin tilge tıek etti. Onyń aıtýynsha, joba resmı statıstıka týraly Eýropanyń modeldik zań erejeleriniń negizinde daıyndalǵan.

«Negizgi maqsat - halyqaralyq tájirıbeni, halyqaralyq standarttar men qaǵıdattardy  eskere otyryp, ınstıtýtsıonaldyq deńgeıde statıstıkalyq protsesterdiń jáne ónimderdiń sapasyn qamtamasyz etý. 2 zańnamalyq aktige zań jobasymen túzetýler engiziledi. Uǵymdyq bóligin naqtylaýǵa jáne keńeıtýge baǵyttalǵan ákimshilik derekter men ulttyq sanaq sekildi ózgerister, sondaı-aq birqatar ıntervıýer, metaderekter syndy jańa uǵymdar, telefon arqyly pikir alý júrgizýdiń kompıýterlendirilgen júıesi engizilgeli otyr», - degen Rýslan Dálenov májilismenderden zań jobasyn qoldaýdy surady.

Zań jobasyn talqylaý barysynda depýtat Vladıslav Kosarev QR Ulttyq ekonomıka birinshi vıtse-mınıstrine óziniń saýalyn joldady.

«Bizdiń statıstıka organy eshbir mınıstrlikke táýeldi bolmaýy kerek. Ekinshiden, statıstıka organynyń óńirlerdegi jelisi qandaı? ıAǵnı, qalalar men aýdandardaǵy organdar  qalaı jumys istep jatyr. Taǵy bir suraq: jalǵan statıstıkalyq esep beretin organnyń jaýapkershiligi qandaı? Sondaı-aq, taǵy bir replıka: eýropalyq elderdiń oıyna súıene berýdi qoıý kerek. Jumysty eshkimge qaramaı ózimiz júrgizeıik. Qanatymyz bekidi. «Sem aǵa» bizge qalaı qadam basý kerektigin úıretpeıtindeı, jumys júrgizsek!?», - deıdi májilismen.

Bul suraqqa jaýap bergen Rýslan Dálenov sheteldik tájirıbe kózsiz kóshirilip jatpaǵanynyn basa aıtty.

«Syrttaǵy tájirıbeni biz tek saralaımyz. Eger izgisi bolsa alamyz. Álemniń ozyq tájirıbelerine súıený bizdiń tikeleı mindetimiz. Aýdandyq qurylymdar týraly aıtar bolsam, statıstıka organdary óte jaqsy jaraqtandyrylǵan. 2,5 myńǵa jýyq qyzmetshi bar. 16 oblysta, 180 aýdanda organǵa qarasty basqarmalar men bólimder jumys jasap jatyr. «Bir tereze» qaǵıdaty óz nátıjesin berýde. Biz tipti pılottyq joba retinde málimetterdi jınaıtyn adam qaǵaz ustap júrmeıtindeı, planshetpen málimet berý tájirıbesin engizgeli jatyrmyz», - dedi Rýslan Dálenov.