Depýtat Shavhat Ótemisov elimizdiń batys óńirindegi aýdan turǵyndarynyń ótinishin jetkizdi

dep habarlaıdy QazAqparat.

Depýtattyń saýal jasaýyna Batys Qazaqstan oblysynyń shalǵaıda ornalasqan Jánibek (500 shaqyrym) jáne Bókeı ordasy (600 shaqyrym) aýdandary turǵyndarynyń oblys ortalyǵy - Oral qalasyna qatynaýdaǵy shegip otyrǵan aıtarlyqtaı qıyndyqtary negiz bolǵan.

Parlamentshiniń aıtýynsha, 1992 jylǵa deıin Jánibek jáne Saıqyn stansylaryna toqtap júrgen poıyzdardan qazirgi kúnge bireýi ǵana qaldy. Ol poıyzǵa mingen Qazaqstan azamaty Oralǵa jetýi úshin eki jerde poıyzǵa aýysyp minýi qajet. Mysaly, Saıqyn stansysynan poıyzǵa otyrǵan adam Krasnyı Kýtqa baryp túsedi, sodan keıin Ýrbahqa baratyn poıyzǵa minedi. Ýrbahtan Oralǵa deıin júretin poıyzdy kútýge májbúr bolady. Bul turǵyndar úshin óte qolaısyz.

«Tikeleı temirjol qatynasy bolmaǵandyqtan, atalǵan aýdandardyń turǵyndary avtomobıl kóligimen qatynaýǵa májbúr. Bul eldi mekenderde oblys ortalyǵynyń joǵary oqý oryndarynda eki myńǵa jýyq stýdent turady, kúndelikti azyq-túlik taýarlar da Oraldan ákelinedi. Sonymen qatar halyqtyń medıtsınalyq mekemelerge qaralyp turýy kerek qoı. Kúz, qys, kóktem mezgilderinde onsyz da nashar avtomobıl joldary múgedekter, qart adamdar, naýqastar, jas balalar men analardyń oblys ortalyǵyna jetý múmkindikterin shekteýde. Joǵarydaǵy aıtylyp otyrǵan máseleni «Oral-Astrahan» poıyzyn qazaqstandyq qurammen ashý nemese Saıqyn-Ýrbah stansylarynyń arasynda júretin tirkeme vagondar shyǵarý arqyly sheshýge bolar edi. Osy jylǵy qańtardan Keden odaǵynyń qurylýy bul oıdy iske asyrýǵa oń yqpalyn tıgizedi dep atalǵan aýdan turǵyndary úmit artýda»,- dedi Májilis depýtaty Shavhat Ótemisov.