Depýtat shaǵyn mektepterdi kútip ustaýdyń normatıvterin qaıta qaraýdy usyndy
NUR-SULTAN. QazAqparat – Parlament Májilisiniń jalpy otyrysynda depýtat Jámılá Nurmanbetova shaǵyn jınaqty mektepterdiń máselesin kóterdi. Osy oraıda Úkimet basshysynyń orynbasary Eraly Toǵajanovtyń atyna depýtattyq saýal joldandy, dep habarlaıdy QazAqparat tilshisi.
Onyń paıymynsha, Bilim mınıstrligi mekteptegi bilim berý baǵytynda júrgizip jatqan reformalary shaǵyn jınaqty mektepter qyzmetiniń ereksheligin tıisti deńgeıde eskermeı otyr.
«Orta bilimniń jańartylǵan mazmunyn engizý protsesi, sonymen birge shaǵyn jınaqtaǵy mektepterde muǵalimderdiń pedagogıkalyq júktemesi men olardyń jalaqysy erekshe nazar aýdarýdy talap etedi. Máselen, atalǵan mektepterde birneshe túrli pándi júrgizetin bir muǵalim sabaqqa daıyndyq pen ony birneshe synypta ótkizý kezinde eleýli metodıkalyq júktemege tap bolady», - dedi depýtat.
Osy oraıda ol bul jaǵdaılar saldarynan muǵalimderdiń jalaqysy tómen ekenin aıtty.
Sonymen qatar Jámılá Nurmanbetova shaǵyn jınaqtaǵy mektepterde ınternet jyldamdyǵy máselesin de sheshý kerektigin alǵa tartty.
Depýtat atalǵan máselelerdi eskere otyryp, shaǵyn jınaqtaǵy mektepterdegi problemany sheshýge qatysty tıisti qadamdardy jasaýdy usyndy.
Eske sala keteıik, byltyr kúzde QR Bilim jáne ǵylym mınıstri Ashat Aımaǵambetov shaǵyn jınaqty mektepterdiń muǵalimderine jalaqy tóleý tetigi ózgertiletinin aıtqan edi.
