Depýtat «Semeı ormany» mekemesindegi problemany atady

ASTANA. KAZINFORM – Búgin Májilistiń jalpy otyrysynda depýtat Nurtaı Sabılıanov «Semeı ormany» memlekettik mekemesiniń qyzmetkerlerine ústemaqy tóleý, áleýmettik qorǵaý sharalaryn jetildirý máselesin kóterdi. Osy oraıda ol Úkimet basshysy Oljas Bektenovtiń atyna saýal joldady. 

«QR Úkimetiniń 2015 jylǵy 31 jeltoqsandaǵy № 1193 qaýlysyna sáıkes, memlekettik orman sharýashylyǵy qyzmetkerlerine 100 paıyzǵa deıin qosymsha ústemaqy berý qarastyrylǵan. Alaıda, «Semeı ormany» memlekettik mekemesiniń tehnıkalyq personalyna - júrgizýshilerine, radıobaılanys operatorlaryna, traktorshylaryna, basqalaryna (№ 131 erekshelik qyzmetkerlerine) bul ústemaqy tólenbeı otyr. Osy másele sheshimin tabý kerek. Ekinshiden, aýyldyq jerlerde tabıǵatty qorǵaý fýnktsııalaryn júzege asyratyn laýazymdy adamdarǵa 25 paıyzdan kem emes ústemaqy tólenýi tıis. Biraq bekitilgen qyzmetter tizbesinde aýyldarda tabıǵatty qorǵaý fýnktsııalaryn júzege asyratyn qyzmetkerler men mamandar engizilmegen. Osy sanatty atalǵan qaýlyǵa engizý qajet», - dedi N. Sabılıanov.

Onyń aıtýynsha, Eńbek Kodeksine sáıkes azamattyq qyzmetshilerge laýazymdyq aılyqaqy mólsherinde saýyqtyrýǵa arnalǵan járdemaqy tóleý qarastyrylǵan. Biraq «Semeı ormany» memlekettik mekemesiniń tehnıkalyq personal sanatyna kiretin jumysshylar osy járdemaqyny ala almaı otyr. Sonymen qatar orman sharýashylyǵy qyzmetkerleriniń ómiri men densaýlyǵyn saqtandyrý qajet.

«Bul turǵyda «Semeı ormany» mekemesiniń tehnıkalyq personalyna ústemaqy tóleý, saýyqtyrý járdemaqylaryn berý jáne olardyń medıtsınalyq ońaltý uıymdarynda emdelýin qamtamasyz etý qajet. Aýyldyq jerlerde tabıǵatty qorǵaý fýnktsııalaryn júzege asyratyn qyzmetkerlerge 25% qosymsha aqy qosý, sondaı-aq orman sharýashylyǵy qyzmetkerleriniń ómiri men densaýlyǵyn saqtandyrý máselelerin qarastyrýdy suraımyn», - dedi depýtat.