Depýtat: Saıası reformalar – jańa Qazaqstan qurý jolyndaǵy ıgi is

TALDYQORǴAN. QazAqparat - Saıası reformalar – «Jańa Qazaqstan» qurý jolyndaǵy ıgi is. Prezıdenttiń jańa Joldaýyn tyńdaǵan Taldyqorǵan qalalyq máslıhatynyń depýtaty Baıan Erjanova osyndaı pikirin bildirdi, dep habarlaıdy QazAqparat tilshisi.

«Búgin Memleket basshysy Qasym-Jomart Toqaevtyń Qazaqstan halqyna arnaǵan Joldaýyn kórip, «Jańa Qazaqstan» qurý jolyndaǵy jarqyn bastamalaryn iske asyrý bastaldy dep oılaımyn. Proportsıonaldyq, majorıtarlyq saılaý júıesindegi 70/30 qaǵıdasymen saılaý, depýtattardyń saılaýaldy baǵdarlamany iske asyrýdaǵy jumystardy kúsheıtý, jergilikti ózin-ózi basqarýdaǵy júıeli ózgerister, partııalyq júıeni básekege qabiletti etý, BAQ qyzmeti týraly zańdy qaıta qaraý syndy bastamalar Prezıdent qańtar aıynda aıtqan «Jańa Qazaqstan» qurýdaǵy alǵashqy qadamdarynyń biri«, - dep sanaıdy Baıan Erjanova.

Depýtattyń paıymynsha, saıası reformalardyń jańa baǵyttary óz kezeginde – ekonomıkaǵa, qoǵamdyq saıası ómirge de oń ózgeris ákeledi.

»Máslıhat depýtaty retinde men de óńirimizde el damýy úshin atqarylatyn isterge bir kisideı jumylyp, jaqsy nátıjelerge qol jetkizemiz degen senimim mol. Batyl bastamalar oń ózgerister ákelsin«, - degen pikirin bildirdi Taldyqorǵan qalalyq máslıhatynyń depýtaty Baıan Erjanova.