Depýtat saýalyna atústi qaraıtyn Úkimet múshelerinen Májilis zalynda jaýap alynady

ASTANA. QazAqparat - Depýtattardyń joldaǵan saýalyna atústi qaraıtyn Úkimet múshelerinen Májilis zalynda jaýap alynady. Bul týraly Májilistiń jalpy otyrysynda palata tóraǵasy Erlan Qoshanov aıtty, dep habarlaıdy QazAqparat tilshisi.

«Qazir depýtattyq saýaldar týraly aıtyldy. Sapasyz, atústi jaýap beretin Úkimet múshelerin bolashaqta Májilis zalyna shaqyryp, osy jerde aýyzsha jaýap alýymyzǵa bolady. Oǵan reglament boıynsha da, «Parlament jáne onyń mártebesi týraly» zań boıynsha da quqyǵymyz bar. Sondyqtan depýtattardyń saýalyna jaýap tolyq, sapaly, nátıjeli ári naqty berilýi qajet. Sizderden sondaı jumys kútemiz», - dedi Erlan Qoshanov búgin Májiliste 2022 jylǵy respýblıkalyq bıýdjettiń atqarylýy týraly esep bergen Úkimet múshelerine.