Depýtat «Saryaǵash» shıpajaıyn jekeshelendirýden bas tartýdy talap etti

ASTANA. KAZINFORM – «Saryaǵash emdeý-ońaltý ortalyǵyn jekeshelendirý sol jerde jumys isteıtin jáne emdelýge keletin qazaqstandyqtarǵa keri áserin tıgizýi múmkin. Bul pikirdi Senat depýtaty Murat Qadyrbek aıtty.

«Shıpajaı jyl saıyn demalýǵa jáne emdelýge keletin 20 myń kelýshini qabyldaıdy, turý quny táýligine 14-25 myń teńge aralyǵynda. Qazirgi ýaqytta osy aýmaqta 50-den astam jeke sanatorıı bar. Olardyń baǵasy 40 000-nan 120 000 teńgege deıin jetedi, ıaǵnı qarapaıym halyq úshin qoljetimdiligi tómen. «Jekeshelendirýdiń 2021-2025 jyldarǵa arnalǵan Keshendi josparyna» sáıkes, shıpajaı básekelestik ortaǵa berýge usynylǵan uıymdar tizimine endi. Shıpajaıdyń keshendi josparǵa qosylýy aımaq turǵyndaryn qatty alańdatady», - dedi depýtat.

Onyń aıtýynsha, jekeshelendirýden keıin jańa ıesi tabysty kóbeıtý úshin qyzmetkerlerdi qysqartqysy kelse, osy sanatorııde jumys isteıtin aýyl turǵyndary jumyssyz qalýy múmkin.

Osyǵan baılanysty, senator Murat Qadyrbek Premer-Mınıstr Oljas Bektenovten sanatorııdi Jekeshelendirýdiń keshendi josparynan shyǵarýǵa járdemdesýdi surady.