Depýtat: «Samuryq-Qazyna» – Qazaqstan ekonomıkasynyń draıveri emes, tejeýishi

ASTANA. KAZINFORM – Májilis depýtaty Ádil Jubanov Premer-mınıstrdiń atyna saýal joldap, «Samuryq-Qazyna» qoryn qazirgi kúıinde saqtap qalý qanshalyqty aqylǵa qonymdy ekenin surady.

- Eldiń jalpy ishki óniminiń 50 paıyzyna deıingi aktıvterdi jalǵyz qorǵa shoǵyrlandyrý jáne oǵan syrttan ýaqtyly aýdıt jasaýǵa múmkindiktiń joqtyǵy basqarýdy tıimsiz etip, toqyraýǵa ákeledi. Taldaýlar qordyń «QazMunaıGaz», «Qazaqstan temir joly», «KEGOC» sııaqty negizgi aktıvteriniń rentabeldiligi azaıyp, qarjyly kórsetkishteri túskenin, borysh júktemesiniń artqanyn kórsetip otyr. Qordyń satyp alý sharalary men basqarý isindegi júıelik teńgerimsizdikterdi joımas, «Samuryq-Qazyna» ekonomıkalyq damýdyń draıveri emes, tejeýishi bolyp qala beredi, - dedi ol. 

Onyń paıymdaýynsha, «Samuryq-Qazynany» tolyqtaı ınstıtýtsıonaldyq turǵydan qaıta júkteý kerek. Sonda ǵana ol básekege qabiletti ekonomıkalyq damytý platformasyna aınalar edi.

Ádil Jubanov saýal sońynda Úkimet aldyna birneshe usynys tastady. Olar:

• Qordyń jáne enshiles kásiporyndarynyń jumysyna syrttan táýelsiz ári halyqaralyq sarapshylardy tarta otyryp, jan-jaqty aýdıt júrgizý;
• Qordyń quramyndaǵy logıstıka, qurylys, telekommýnıkatsııa, jer qoınaýyn ıgerý, qaıta óńdeý salasyndaǵy aktıvterin birtindep básekeli ortaǵa berý;
• Qysqa merzimde qordy transformatsııalaý; 
• Qordyń dırektorlar keńesin halyqaralyq deńgeıdegi táýelsiz kásipqoılardy tartý arqyly jańartý. 

Buǵan deıin osy depýtat Ádil Jubanov «Samuryq-Qazyna» aktsıonerlik qoǵamyn taratyp jiberýdi usynǵan bolatyn.

Keıin ulttyq ál-aýqat qorynyń ókilderi onyń synyna jaýap bergen bolatyn.