Depýtat Sabılıanov: Kvazımemlekettik sektordy qarjylandyrýdy toqtatý qajet
«2016 jyly Qordyń paıdasy 575 mlrd. teńge boldy, munaı-gaz jáne ken óndirý sektorlarynyń qyzmeti esebinen - 510 mlrd. teńge, telekommýnıkatsııa sektory esebinen - 56 mlrd. teńge paıda tapqan. Birlesken kásiporyndar men assotsıatsııalanǵan kompanııalardyń paıdadaǵy úlesi 2015 jyly - 149 mlrd. teńgeni qurady. Al 2016 jyly ol artyp, 356 mlrd. teńgege jetti. Bul óz kezeginde Qor jumysynyń oń nátıjesi. Sonymen qatar, sońǵy bes jylda kvazımemlekettik sektordyń jeke sýbektileriniń aktıvterdi basqarý tıimdiliginiń tómendeý qarqyny baıqalady. Osylaısha, «Samuryq-Qazyna» UÁQ» AQ aktıvteriniń tıimdilik koeffıtsıenti 2012 jylǵy 7 paıyzdan 2016 jyly 2,6 paıyzǵa nemese 2,7 ese azaıdy. Menshikti kapıtaldyń tıimdilik koeffıtsıenti 2016 jyly 2,8 esege azaıdy»,-dep toqtaldy depýtat Nurtaı Sabılıanov.
Onyń sózine qaraǵanda, 2016 jyly Qordyń qaryz somasy onyń aldyńǵy jylmen salystyrǵanda 1 trln. 352 mlrd. teńgege azaıǵanyna qaramastan, qaryz somasy 2016 jyly 9 trln. 938 mlrd. teńgeni (29,8 mlrd $) qurap otyr (kvazımemlekettik sektordyń barlyq qaryzdarynyń 70 paıyz shamasynda), onyń ishinde Úkimet qaryzy - 3 trln. 52 mlrd. teńge, ózge de qaryzdar - 6 trln. 889 mlrd. teńge (20,6 mlrd $).
«Al, 2016 jyly «Samuryq-Qazyna» UÁQ» AQ tobynyń qaryzdar men shyǵarylǵan boryshqorlyq baǵaly qaǵazdar paıyzdaryna 320 mlrd. teńge jumsaldy. Bul Qor úshin óte úlken salmaq. Sondyqtan Qordyń qaryzdy óteýge qyzmet kórsetýine úlken aqsha somasy jumsalatynyn, Qor kompanııalarynyń tóleýge qabiletsizdik jaǵdaıynda qaryzdy tóleý bıýdjet esebinen júzege asatynyn eskere otyryp (Qordyń birden-bir aktsıoneri QR Úkimeti bolǵandyqtan), alynǵan tabystardy, bos qarajat pen paıdany qaryzdardy óteýge jumsaý qajet»,-deıdi N. Sabılıanov.
Budan bólek, sońǵy úsh jylda kvazımemlekettik sektor sýbektileriniń jarǵylyq kapıtaldaryn toltyrýǵa respýblıkalyq bıýdjetten 948,5 mlrd. teńge bólindi, olardyń kóp bóligi ýaqytyly ıgerilmeıdi jáne qolma-qol aqshanyń baqylaý shottarynda ornalasqany atap ótildi.
«2017 jylǵy 1 qańtardaǵy málimetterge sáıkes, kvazımemlekettik sektor sýbektilerindegi qaldyqtar 113 mlrd. teńgeni qurady. Sondyqtan da, kvazımemlekettik sektor sýbektileriniń jarǵylyq kapıtaldaryn bıýdjettik qarajattar esebinen toltyrýdy toqtatý qajet. Bul baǵytta «Samuryq-Qazyna» UÁQ» AQ birneshe jyldar boıy bıýdjetten qarjylandyrylmaıtyn jáne qarajattardy oblıgatsııalar shyǵarý arqyly tartatyn Malaızııadaǵy «Temasek Holdıng» kompanııasynyń tájirıbesin qabyldaý qajet»,-dedi depýtat.
