Depýtat ruqsatsyz túsirilim men prankterdi shekteýge qatysty pikir bildirdi

ASTANA. KAZINFORM – Mádenıet jáne aqparat mınıstrligi ruqsatsyz foto jáne vıdeo túsirýdi, sonyń ishinde prankterdi zańmen shekteýdi josparlap otyr. Ózgeris jýrnalıster men blogerlerdiń jumysyna qalaı áser etedi, qoǵamdyq ortada túsirilim tártibi qandaı bolmaq? Oǵan QR Parlamenti Májilisiniń depýtaty Ekaterına Smolıakova jaýap berdi.

Depýtattyń aıtýynsha, mundaǵy maqsat – túsirilimdi tolyq tyıyp tastaý emes.

– Qazir jahandyq tsıfrlandyrý áleminde ómir súrip jatyrmyz. Elimizde jasandy ıntellekt týraly zań qabyldandy, qazir Májilis qabyrǵasynda tsıfrlyq kodeks talqylanyp jatyr.

Munyń barlyǵy azamattardyń quqyǵyn qorǵap, qaýipsizdigin saqtaý úshin jasalyp jatyr. Adamdardy ruqsatsyz, kez kelgen jerde beınejazbaǵa túsirýdi shekteý de sol bastamalardyń biri, – dedi depýtat Jibek Joly arnasynyń «Búgin LIVE» baǵdarlamasynda.

Smolıakova atap ótkendeı, másele jalpy túsirilim tártibin retke keltirýde. 

– Qazaqstanda qoǵamdyq oryndarda túsirýge jalpy ruqsat bar, alaıda adamdardyń beınesin paıdalaný bólek retteledi: azamatty kelisiminsiz túsire berýińiz múmkin, biraq ol materıaldy ruqsatsyz taratýǵa bolmaıdy, – dedi Smolıakova.

Depýtat prank jasaýǵa qatysty kontenttiń aldyn alý qajettigin aıtty.

– Aldyn ala kelisim alynbaı, adamdardy ádeıi kúızeliske túsiretin, qaýipti nemese ar-namysyna tıetin jaǵdaıda túsiriletin vıdeolar etıkalyq jáne quqyqtyq normalardy buzady, – dedi depýtat.

Sonymen qatar Smolıakova jýrnalısterdiń jumysyn shekteý kózdelmegenin atap ótti.

– Májiliste jýrnalıster depýtattardyń betine kamera taqap sóıleıdi. Etıka saqtalmaıtyn tustar bar. Osyndaı sátterdi retteý qajet. Bul jýrnalısterdiń jumysyna kedergi keltirmeý kerek. Zań jobasy endi qaralady, jumys toby da endi qurylady. Oǵan keminde jarty jyl ýaqyt ketýi múmkin, – dep qorytyndylady depýtat.

Aıta keteıik, buǵan deıin depýtat Edil Jańbyrshın LGBT-ny nasıhattaǵandarǵa qandaı jaza qoldanylatynyn aıtty.