Depýtat Reseıdegi qylmys álemi basshylarynyń Qazaqstanǵa aǵylýy qaýpine alańdaýshylyq bildirdi
ASTANA. Qarashanyń 17-si. QazAqparat /Qanat Mámetqazyuly/ ‑ Búgin QR Parlamenti Májilisiniń jalpy otyrysynda depýtat Nurlan Ábdirov Úkimet basshysynyń atyna depýtattyq saýal joldady.
Onda depýtat kórshiles Reseıde qylmys áleminiń basshylaryna jarııalanǵan kúresten keıin, elimizge krımınaldyq top bedeldileriniń aǵylý qaýpine oraı alańdaýshylyq bildirip, tıisti sharalardy qamtýǵa úndedi, dep habarlaıdy QazAqparat.
«Sońǵy ýaqytta kórshiles Reseı Federatsııasynda uıymdasqan qylmyspen kúreste keshendi, júıeli sharalar qolǵa alyna bastady. Eń bastysy qylmys áleminiń basshylaryna, qylmys bedeldilerine qatysty qatań ári teńdessiz mańyzdy saıası-zańnamalyq sheshimder qabyldandy. Máselen, osydan biraz buryn, qylmystyq qaýymdastyq pen qylmystyq uıymdarǵa qatysty jańa uǵymdar naqtylanyp, ol boıynsha jaýapqa tartý ómir boıǵy túrmege jabýǵa deıin kúsheıtildi. Osylaısha, buryndary «kóleńkede» qalyp, jaýapkershilikten qashyp, biraq qylmysty uıymdastyrý men basqarýǵa jetekshilikti júzege asyrǵandardy jazalaý da qatań kúsheıetin bolyp otyr. Bundaı uıymdasqan qylmystyq top basshylaryna shyn máninde qýdalaý bastalǵan jaǵdaıda, qylmystyq álem basshylary óz «shtabtaryn» kórshiles memleketterge ornalastyrýǵa da áreket etýi múmkindigin joqqa shyǵarýǵa bolmaıdy. Eń uzyn ortaq memlekettik shekara men ortaq naryqtyq keńistikke ıe bolyp otyrǵandyqtan, onyń ústine tıisti normatıvtik-quqyqtyq aktiler qamtylmaǵandyqtan Qazaqstan men Reseı arasynda uıymdasqan qylmystyń da «kóshýinen» saqtaný kerek», dedi depýtat. Onyń aıtýynsha, quqyq qorǵaý organdarynyń málimetteri boıynsha sońǵy ýaqytta jaqyn sheteldik krımınaldyq top bedeldileriniń Qazaqstan aýmaǵyna kelý faktileri jıileı túsken.
«Osyǵan oraı, Úkimet pen quzyrly organdar tarapynan aldyn alý sharalary qolǵa alynyp, qaýipsizdiktiń turaqty deńgeıin saqtaýdy qamtamasyz etý úshin arnaıy zańnamalyq úderister júrgizilse ıgi», dedi N. Ábdirov.
