Depýtat R.Muqashev sottalǵandardy ońaltý boıynsha arnaıy memlekettik baǵdarlama ázirleýdi usyndy
Bul týraly búgin Astanada Halyqaralyq túrme reformasy (PRI) uıymdastyrǵan konferentsııada Májilistiń Zańnama jáne sot-quqyqtyq reforma komıtetiniń tóraǵasy, depýtat Rahmet Muqashev osylaı málim etti.
«Ókinishke qaraı, bas bostandyǵynan aıyrý mekemelerinen shyqqan adamdardy ońaltý jumystarymen eshkim aınalyspaıdy. Nátıjesinde olardyń deni qylmyskerlerdiń jáne túrmege qaıtyp túsetinderdiń sanyn tolyqtyryp jatady», - dedi R.Muqashev.
Onyń aıtýynsha, qylmystyq-sot júıesindegi reformanyń negizinde 2010 jyldan beri bas bostandyǵynan aıyrý mekemelerinen bosaǵan adamdarmen jergilikti bılik aınalysady. Alaıda, olardyń jumysyn uıymdastyrýdyń ortaq júıesi joq. Sondyqtan bul mindetti dinı nemese úkimettik emes uıymdar oryndap keledi.
«Osy oraıda qaıta áleýmettendirý jáne ońaltý salasyna erekshe mán berýmen ǵana shektelmeı, arnaıy memlekettik baǵdarlama jasaqtaý qajet», - dep túıindedi oıyn R.Muqashev.
PRI halyqaralyq sarapshy mekemesi ótkizgen zertteýler boıynsha, tıimdi áleýmettendirý júıesiniń joqtyǵynan qaıta qylmysqa boı aldyratyndardyń sany artýda. Sonymen qatar túrmeden bosap shyqqandardyń tek 5 paıyzy memlekettik organdardan kómek suraıdy eken. Al qalǵandary týǵan-týysqandardyń kómegine júginedi.
