Depýtat R. Halmuradovty Májilistegi memlekettik tildiń jaǵdaıy alańdatady
ASTANA. 6 aqpan. QazAqparat - Búgin Parlament Májilisiniń jalpy otyrysynda depýtat Rozaqul Halmuradov áriptesterine úndeý jasap, memlekettik til máselesin kóldeneń tartty.
Óz sózinde 2007 jyldan bastap Parlament Májilisiniń jalpy otyrystarynda depýtattar ózderiniń depýtattyq saýaldaryn qaı tilde jarııalaǵanyn zerdelep kele jatqandyǵyn aıtqan R. Halmuradov, bul baǵytta birqatar kórsetkishterdi jarııa etti. «Besinshi saılanǵan Parlament Májilisinde ótken bir jyldyń ishinde ulty qazaq depýtattar tarapynan barlyǵy 186 depýtattyq saýal jarııalanǵan bolsa, solardyń 78-i nemese 42 paıyzy qazaq tilinde, al 108-i nemese 58 paıyzy orys tilinde jarııalanypty. Tórtinshi saılanǵan Májiliste depýtattyq saýaldardyń 60 paıyzy qazaq tilinde, 40 paıyzy orys tilinde jarııalanǵan bolatyn. Men bul týraly múmkin jarııa túrde aıtpas ta edim. Biraq 30 qańtardaǵy jalpy otyrysta jarııalanǵan depýtattyq saýaldar meni osyǵan májbúr etti», - deıdi R. Halmuradov. Onyń aıtýynsha, sol kúngi Májilistiń otyrysynda 11 qazaq depýtatynyń 9-y ózderiniń depýtattyq saýaldaryn orys tilinde, al ekeý-aq qazaq tilinde jarııalaǵan.
«Qarapaıym halyq barlyq máselede Parlamentke qaraıdy. Sebebi bizdi solar saılaǵan. «Parlament qaı tilde sóıleıdi», «Parlamenttiń qazaqshasy qandaı» degen sııaqty maqalalar buqaralyq aqparattyq quraldarynda basylyp, hattar kelip jatady. Ońtústik óńirde issaparmen bolyp qaıtqan bir top depýtattar buny óz kózimen kórip, qulaǵymen estip qaıtty. Saılaýshylarymyz elimizde qazaq tili jappaı qoldanys tiline aınalyp, memlekettik til mártebesine laıyq tórden oryn alýynda ózderi saılaǵan depýtattardyń aldyńǵy qatarda bolýlaryn qalaıdy. Osy senimge laıyq bolyp, ózge tildiń bárin bileıik, ózimizdiń memlekettik tilimizdi qurmetteıik. Elbasymyz aıtqandaı, Qazaqstannyń bolashaǵy - qazaq tilinde ekendigin umytpaıyq aǵaıyn», - dedi depýtat.
