Depýtat: Prezıdenttiń sheshimderi eldegi qaýipsizdikti saqtap qaldy
Qoǵamdy alańdatyp otyrǵan, sheshimin tappaı kele jatqan máselelerdiń qatarynda sońǵy jyldary BAQ betterinde dinı ekstremızm men terrorızm taqyryby jıi aıtylyp júr. Mundaı jaǵdaıǵa jol berýge bolmaıtynyn senator Sultan Dúısembınov QR Premer-Mınıstriniń atyna joldaǵan depýtattyq saýalynda aıtty.
Senatordyń aıtýynsha, beıbit sherýmen bastalǵan qańtar oqıǵasyn dinı radıkaldar, ekstremıstik aǵymdar, qylmystyq toptar paıdalanyp, el tynyshtyǵyn buzǵan úlken qaqtyǵysqa ulasqan.
«Osyndaı qysyltaıań shaqta, Prezıdentimiz Qasym-Jomart Kemeluly Toqaevtyń barlyq jaýapkershilikti óz moınyna alyp, ýaqtyly ári batyl strategııalyq sheshim qabyldaýynyń arqasynda elimizdiń tutastyǵy men qaýipsizdigi saqtalyp qaldy. Bul rette, Ujymdyq qaýipsizdik týraly shart uıymy Qaýipsizdik keńesiniń kezekten tys sessııasynda sóılegen sózinde Memleket basshysy: «Olardyń basty maqsaty: konstıtýtsııalyq qurylysqa nuqsan keltirý, basqarý ınstıtýtyn búldirý, bılikti basyp alý bolǵany anyqtaldy», - dep baǵasyn bergen bolatyn. Din atyn jamylǵan jat aǵymdardyń músheleri dinı saýaty men áleýmettik turmysy tómen jastarymyzdy óz qarmaqtaryna túsirý maqsatynda, halqymyzdyń ǵasyrlar boıy qalyptasqan dástúrli dini men salt-dástúrine kúdik keltirip, jastardyń sanasyn ýlap, jat ıdeologııasyn taratýmen aınalysqany belgili bolyp otyr», - dedi senator.
Sondaı-aq, ol dinı ekstremızmge qarsy kúres jónindegi júıeli sharalar keshenin iske asyrý qajettigine nazar aýdardy.
«Ortalyqtan basqarý jáne úılestirý arqyly tıisti ádistemelik, aqparattyq, qarjylyq qoldaý kórsete otyryp, óńirlerdegi aqparattyq nasıhat toptarynyń qyzmetin jetildirý jáne kúsheıtýdi jalǵastyrý qajet. Sondaı-aq, dinı ahýaldy tereń zerdelep, dinı ekstremızm men terrorızmge qarsy is-qımyl jónindegi jańa memlekettik baǵdarlama daıyndaý mańyzdy dep sanaımyz», - dedi Sultan Dúısembınov.
