Depýtat platformalyq jumyspen qamtý salasyndaǵy kemshilikti atady
ASTANA. KAZINFORM — Búgin Quryltaıdyń jalpy otyrysynda depýtat Gúlzıra Atabaeva platformalar arqyly halyqty jumyspen qamtý máselesin kóterip, Eńbek jáne halyqty áleýmettik qorǵaý mınıstri Asqarbek Ertaevtyń atyna depýtattyq saýal joldady.
— Memleket basshysy Qasym-Jomart Toqaev Qazaqstan halqyna Joldaýynda Úkimetke jyl sońyna deıin tsıfrlyq jumyspen qamtýdyń ońaılatylǵan quqyqtyq rejımin qalyptastyrý mindetin qoıdy. Ol úshin kásipkerlikti memlekettik qoldaý sharalaryn jekemenshik marketpleısterdiń, bankterdiń, logıstıkalyq kompanııalar men tsıfrlyq servısterdiń múmkindikterimen ushtastyrý qajet. Eńbek jáne halyqty áleýmettik qorǵaý mınıstrliginiń málimetinshe, 2026 jylǵy qyrkúıektegi jaǵdaı boıynsha Qazaqstanda 35 ınternet-platforma operatory arqyly qyzmet kórsetetin 956 myńǵa jýyq oryndaýshy bolǵan. Aldaǵy ýaqytta platformalyq ekonomıkaǵa tartylǵan adamdardyń sany geometrııalyq progressııamen ósedi, — dedi Gúlzıra Atabaeva.
Onyń aıtýynsha, platformalyq jumyspen qamtý qoldanystaǵy modeldiń eleýli osal tustary bar ekenin kórsetip otyr.
— Máselen, Yandex Go servısindegi tehnıkalyq aqaý saldarynan taksı júrgizýshileri men kýrerler tapsyrys qabyldap, tabys tabý múmkindiginen ýaqytsha aıyryldy. Sondaı-aq olardyń tapqan aqshasyn shyǵaryp alý kezinde qıyndyqtarǵa tap bolǵany týraly habarlamalar tústi. Bul jaǵdaı bir ǵana jeke tsıfrlyq platformanyń tehnıkalyq aqaýy júzdegen myń azamattyń jumyspen qamtylýy men tabysyna tikeleı áser etip, olardyń bir mezette jumys isteý múmkindiginen aıyrylýyn kórsetti, — dedi depýtat.
Osyǵan baılanysty ol platformalyq jumyspen qamtýdyń Qazaqstannyń eńbek naryǵyna tóndiretin táýekelderine keshendi baǵalaý júrgizýdi usyndy.
Depýtattyń paıymynsha, tsıfrlyq platformalardaǵy jappaı tehnıkalyq aqaýlarǵa nazar aýdarý jónindegi vedomstvoaralyq jospar ázirleý kerek. Sonymen qatar tsıfrlyq platforma operatorlarymen birlesip, uzaqqa sozylǵan aqaýlar kezinde oryndaýshylardy qorǵaýdyń praktıkalyq tetikterin pysyqtaý mańyzdy.
Buǵan deıin Premer-Mınıstr orynbasary — Jasandy ıntellekt jáne tsıfrlyq damý mınıstri Jaslan Mádıev ıAndeks qosymshasyndaǵy aqaý jóninde pikir bildirgenin jazǵan edik.
