Depýtat Pavlodar oblysynda táýelsiz ekologııalyq aýdıt júrgizýdi surady
ASTANA. KAZINFORM — Pavlodar oblysynda ekologııalyq ahýal nasharlap bara jatyr. Bul týraly Senattyń jalpy otyrysynda depýtattyq saýalynda jarııalaý kezinde senator Altynbek Nýhuly málim etti.
Depýtattyń aıtýynsha, aımaq elimizdiń ekonomıkasynda eleýli ról atqarady jáne elektr energııasy, alıýmınıı, ferroqorytpa, kómir men otynnyń edáýir bóligin qamtamasyz etip keledi.
Alaıda, ónerkásiptiń tym kóp shoǵyrlanýy 300 mln tonnadan astam kúl men qoj qaldyǵynyń jınalýyna ákeldi jáne jyl saıyn 700 myń tonnadan astam las zattar shyǵarylatyn boldy.
Ónerkásipti óńir topyraǵynda kóp mólsherde aýyr metaldar tirkeldi, sondaı-aq Ertis ekojúıesine túsetin aýyrtpalyq kúsheıip barady.
Senator bul jaı statıstıka emes, adamdardyń densaýlyǵyna naqty qaýip tóndiretinin atap kórsetti. Qorshaǵan ortanyń lastanýy aımaq turǵyndarynyń ómir súrý sapasyna tikeleı áser etip otyr.
— Onyń ústine statıstıkalyq derekterge sáıkes, Pavlodar, Shyǵys Qazaqstan jáne Qaraǵandy oblystary tynys alý organdary men onkologııalyq aýrýlar boıynsha kósh bastap tur, — dedi Altynbek Nýhuly.
Sonymen qatar depýtat aldaǵy jyldary ónerkásip aýyrtpalyǵy tek óse beretinin atap ótti.
Ekibastuzda jańa energııa bloktaryn iske qosý, GRES-3 salý jáne derekterdi óńdeý ortalyqtary úshin ınfraqurylym salý josparlanǵan. Senator ekologııa máseleleri endi konstıtýtsııalyq deńgeıde bekitilgenin, onda memleket qolaıly qorshaǵan ortany qamtamasyz etýge mindetti ekenin, al azamattardyń ómiri men densaýlyǵyna tónetin qaterlerdi jasyrý jaýapkershilikke tartylatynyn atap kórsetti.
— Ár azamattyń konstıtýtsııalyq quqyǵy men qorshaǵan ortany qorǵaý — bizdiń ortaq mindetimiz. Sondyqtan ekologııalyq máselelerin sheshý — óńirlik saıasattyń ǵana emes, memlekettik deńgeıdegi strategııalyq mindettiń biri bolýy tıis. Osyǵan baılanysty kómir energetıkasyn ekologııalyq turǵydan tereń modernızatsııalaý qajet jáne 300 mln tonnadan astam kúl men qoj qaldyqtaryn qaıta óńdeý boıynsha arnaıy baǵdarlama qajet. Ertis ózeniniń ekologııalyq jaǵdaıyn jaqsartý jáne ónerkásiptik aǵyndy sýlardy tazartý júıesin kúsheıtý, shyǵaryndylardyń ashyq monıtorıng júıesin engizý, táýelsiz ekologııalyq aýdıt júrgizý mańyzdy, — dedi depýtat.
Aıta keteıia, jaqynda Óskemen qalasynda qolaısyz meteorologııalyq jaǵdaılar kezinde zııandy shyǵaryndylar normasyn asyrǵan jylý kompanııasyna aıyppul salyndy.
