Depýtat páter satyp alǵan turǵyndy birden PIK-ke tirkeýdi usyndy
ASTANA. QazAqparat - Qazaqstanda jańa turǵyn úı salý barysynda birden páter ıeleri kooperatıvin qurý qajet. Mundaı usynysty búgin Astananyń tóńireginde turatyn halyqtyń bos ýaqytyn tıimdi uıymdastyrý máselelerine arnalǵan shara barysynda Májilis depýtaty Sapar Ahmetov jasady, dep habarlaıdy QazAqparat.
«Taıaýda ǵana biz turǵyn úı zańnamasyna ózgerister engizý máseleleri boıynsha bastama kóterdik. Birinshi másele - turǵyn úı-kommýnaldyq sharýashylyǵynyń tujyrymdamasyn jasaý. Máselen, qurylysshylar birden úıdiń paıdalanýǵa berilýi týraly aktimen birge kondomınıýmdy tirkeýi kerek. Ekinshi másele, turǵyn úıdi satyp alý-satý aktisimen páterdi alǵannan keıin ol birden avtomatty túrde kondomınıým múshesi bolýy tıis», - dedi Májilis depýtaty.
Osy rette ol atalǵan másele boıynsha QR Premer-Mınıstriniń birinshi orynbasarynyń atyna depýtattyq saýal joldaǵanyn atap ótti. Onyń aıtýynsha, «Turǵyn úı qatynasy týraly» zań jobasyn osy jyldyń sońyna deıin nemese kelesi jyly ázirleý josparlanyp otyr.
