Depýtat: Partııa Tóraǵasy qoıǵan mindetterdi júzege asyratyn myqty kadrlar qajet

TALDYQORǴAN. QazAqparat - Partııa Tóraǵasynyń qoıǵan mindetterin oıdaǵydaı júzege asyrý úshin jaýapkershilik pen talapqa saı kadrlar qajet. Bul pikirdi «Amanat» partııasynyń Taldyqorǵan qalalyq fılıaly tóraǵasynyń birinshi orynbasary, depýtat Amanjol Jazyqbaev bildirdi, dep habarlaıdy QazAqparat tilshisi.

«Partııa Tóraǵasynyń qoıǵan mindetterin oıdaǵydaı júzege asyrý úshin jaýapkershilik pen talapqa saı kadrlar qajet. Osylaısha, uıym jergilikti jerlerde partııa qataryn nyǵaıtý jumysyna kirisedi. Resmı derekterge súıensek, «Nur Otan» partııasynyń negizin quraıtyn 4,5 myńnan astam bastaýysh partııa uıymy (BPU) bar.

Partııa músheleriniń biliktiligin arttyrý, BPU jetekshileriniń reıtıngin engizý jáne partııa jarnasynyń 20 paıyzyn qaıtarý arqyly BPU-ny nyǵaıtý josparlanýda. Partııa janyndaǵy Saıası menedjment mektebi 3 myńnan astam partııa múshesin saıası menedjment pen kommýnıkatsııanyń jańa formattary boıynsha oqytatyn bolady.

Jarnanyń 20 paıyzyn qaıtarý týraly aıtqanda, bul qarjynyń partııalyq jobalardy júzege asyrýǵa jumsalatynyn erekshe atap ótken jón. Belgili bolǵandaı, partııalyq jobalar birinshi kezekte aǵa urpaqty, jastardy jáne kómekke muqtaj adamdardy qamtıdy. BPU-nyń jumysy keńeıip, tıimdi quraldary arqyly júzege asyrylady«,- dedi Amanjol Jazyqbaev.

Sondaı-aq depýtat QR Prezıdenti «Jańa Qazaqstan« qurý týraly jarııalap, jumystyń joǵary qarqynyn belgilegenin aıtyp ótti.

«Partııa sezinde atalyp ótkendeı, bul partııa jumysyna úlken yqpal etedi. Sońǵy kezderi partııanyń tóńireginde ártúrli aqparattar men qaýesetter kóp boldy, bireýler tipti taratylýy týraly aıtty. Biraq jańalyqtardan baıqaǵanymyzdaı, partııa jumylyp óz jumysyn jalǵastyratyn bolady. Sonymen qatar, jańa jobalar, ashyq dıalog alańdary jáne qyzmet kórsetýge baǵyttalǵan qoǵamdyq qabyldaýlar túrinde óz jaýabyn berdi»,- dedi A. Jazyqbaev.