Depýtat Oral qalasyndaǵy hokkeı oıyny kezinde tóbelesip qaldy
ASTANA. QazAqparat - Jeńis kýbogyna arnalǵan hokkeıden qalaaralyq týrnır sheńberinde ótken «Oral» HK (Oral) men «Býrevestnık» HK (Orenbýrg) arasyndaǵy oıyn kezinde qarsylastar tóbelesip qaldy dep habarlaıdy «Ýralskaıa Nedelıa» .
Beıne rolıkten hokkeı oıyny kezinde máslıhat depýtaty, «Steklo-Servıs» JShS dırektory Arkadıı Rýbtsovtyń qarsylasyna judyryq ala júgirgen sáti anyq kórinedi.
Oıyn barysynda Rýbtsov «Býrevestnık» komandasy oıynshylarynyń birimen soqtyǵysyp qalady. Bul basqa da oıynshylardyń jappaı tóbelesýine alyp keldi.
Oblystyq «Muz aıdyny sport saraıy» BJSM dırektory Esqabyl Jalmurzıev bul oqıǵaǵa baılanysty óziniń pikirin bildirdi. «Bul tek oıyn sátindegi kórinis ǵana. Bireýge birdeme unamaı qaldy, sosyn uryp jiberip tóbeles bastaldy da ketti. Keıin qarsylastar bir-biriniń qoldaryn qysyp, tatýlasty»,- dedi Esqabyl Jalmurzıev.
