Depýtat onkologııalyq naýqastarǵa dári-dármektiń ýaqtyly jetkizilmeýi máselesin kóterdi
NUR-SULTAN. QazAqparat - Búgin Parlament Májilisiniń jalpy otyrysynda depýtat Ǵalymjan Eleýov dárilik qamtamasyz etýge qatysty másele kóterip, Densaýlyq saqtaý mınıstriniń atyna depýtattyq saýal joldady, dep habarlaıdy QazAqparat tilshisi.
«Ómirleri úshin asa mańyzdy preparattardyń ýaqytynda jetkizilmegenine baılanysty aýyr dıagnozdary bar adamdardyń sansyz shaǵymdary men aryzdary túsip jatyr. Sáýir aıynyń ortasy bolǵanymen, alaıda tizimdegi dárilik zattardyń 70-ke jýyq pozıtsııasy boıynsha preparat satyp alynbaǵan. Sonymen birge osy 70 tarmaqtan basqa, satyp alyndy dep kórsetilgen 45 pozıtsııa boıynsha alǵashqy jetkizilý merzimi sáýir aıynan bastalady, al keıbireýler tipti 2021 jyldyń qazan aıynan bastap jetkiziledi eken», - dedi depýtat.
Onyń aıtýynsha, 2021 jylǵa arnalǵan Biryńǵaı dıstrıbıýtordan satyp alynatyn dárilik zattardyń, medıtsınalyq buıymdardyń tizimi Densaýlyq saqtaý mınıstrliginiń buıryǵymen 2020 jyldyń 28 shildesinde bekitilgen.
«ıAǵnı, 2021 jyldyń bastalýyna deıin halyqty tegin dárilik zattarmen qamtamasyz etý boıynsha mindet aldyn ala belgilendi. Osyǵan qaramastan meniń resmı saýaldaryma SK-Farmatsııa aqparaty boıynsha onkologııalyq naýqastar úshin L-asparagınaza, Vınblastın, Denozýmab, Metotreksat, Tsıklofosfamıd sekildi isikke qarsy preparattar satyp alynbaǵan», - dedi ol.
Ǵalymjan Eleýovtiń sózine qaraǵanda, «Tamoksıfen» de kesh ákelindi.
Budan bólek, «Anastrazol» jáne «Interferon alfa», «onko-BTsJ» tolyq emes kólemde jetkizildi.
«Qazirgi kezde onkologııalyq aýrýhanalardyń esebinde 180 myńnan astam azamat tirkelgen. Ókinishke qaraı, jyl saıyn elimizde olardyń qatary 30 myń adamǵa kóbeıýde. Bul naýqastarǵa arnalǵan dárilerdiń tipti 10 kúnge keshigip jetkizilýi aýyr jaǵdaıǵa alyp kelýi múmkin», - dedi depýtat.
Munymen qosa ol týberkýlezge shaldyqqan naýqastarǵa arnalǵan preparattar da ýaqytynda jetkizilmegenin atap ótti.
