Depýtat oqýshylardy avtobýspen tasymaldaý máselesin kóterdi
ASTANA. QazAqparat - Májilis depýtaty Irına Smırnova QR Úkimet basshysy orynbasarynyń atyna joldaǵan saýalynda oqýshylardy mektepke avtobýspen tasymaldaý máselesin kóterdi, dep habarlaıdy QazAqparat.
«QR Konstıtýtsııasynyń 30-babynda Qazaqstan azamattaryna memlekettik oqý oryndarynda aqysyz orta bilimge kepildik berilgen. Orta bilim barshasyna mindettelgen. Sonymen birge, elimizdegi 1523 aýylynda ózderiniń orta bilim berý mektebi bolmaǵandyqtan, balalar kórshiles eldi mekenderge baryp oqýǵa májbúr. Búginde 30 000 myńnan astam bala osylaı bilim alyp júr. Olardyń esh kedergisiz mektepke barýyn aýyl ákimdikteri qamtamasyz etýi tıis, ıaǵnı birinshi kezekte turaqty kólikteri bolýy kerek. Atap aıtqanda, kólikter talaptarǵa saı bolyp, qaýipsizdik turǵysynda avtobýspen tasymaldanatyn balalardyń sany otyratyn oryndardan aspaýy qajet», - dep toqtaldy depýtat.
Osy oraıda bul baǵytta ishki ister organdary da qaýipsizdikti qamtamasyz etýi kerektigin, balalar jınalatyn alańdardy tıisti talaptar boıynsha jasaqtaý qajettigin atap ótti.
Smırnova keıbir aýyldarda mektepke jetý úshin balalar birqatar qıyndyqtarǵa tap bolyp otyrǵanyn sóz etti. Máselen, Almaty oblysyndaǵy Іrgeli aýylynyń balalary turaqty avtobýs baǵdarynyń joqtyǵynan, Kemertoǵan eldi mekenindegi jańa mektepke qatynaýy qıyndaǵan.
Sonymen qatar Aqmola oblysy Qosshy aýylynyń balalaryn tasymaldaýda da problema bar, ıaǵnı oqýshylar úılerinen mektepke deıin 6 shaqyrym jaıaý júrýge májbúr.
Al Astananyń mańyndaǵy Tselınograd aýdany Qoıandy eldi mekeniniń turǵyndary joldyń nasharlyǵy men avtobýstyń jetispeıtindigine shaǵymdanyp otyr.
Ońtústik Qazaqstan oblysy Shuqyrsaı aýylynda 264 otbasy turady. On jyldan astam ýaqyttan beri turǵyndar mektep salyp berýdi suraýda. 500-ge jýyq bala kórshi aýylda bilim alyp júr, sondaı-aq oqýshylardy tasymaldaýda qıyndyqtar bar.
