Depýtat O.Asanǵazy Astanadaǵy Agrarlyq ýnıversıtettiń stýdentterine jataqhana salýǵa memleket bıýdjetinen qarajat bólýdi surady
ASTANA. 8 aqpan. QazAqparat /Qanat Mámetqazyuly/ - Astanadaǵy S.Seıfýllın atyndaǵy Qazaq agrotehnıkalyq ýnıversıtetine oqý-tájirıbelik baza qajet.
Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Orazkúl Asanǵazy osylaı málim etti.
Saýal barysynda depýtat Elbasynyń bıylǵy Joldaýynda bilim berý salasyna jańa serpin beretin erekshe mindetter júktelgenin atap ótti. O. Asanǵazynyń aıtýynsha, Joldaýda bilimdi mamannyń jumyspen qamtamasyz etilýi jáne onyń baspanasyna qatysty mindetter oryndy kóterilip otyr.
Depýtat: «Bundaı qaǵıdatty máseleler Elbasy únemi kóteretin aýyl máselesine de tikeleı qatysty. Sondyqtan aýylǵa mamandar daıarlaıtyn agrarlyq baǵyttaǵy joǵary oqý oryndaryna da atalǵan problema barynsha ortaq», - deı kele, osyndaı oqý oryndarynyń biri retinde Astanadaǵy Qazaq agrotehnıkalyq ýnıversıtetin mysalǵa aldy.
Onyń aıtýyna qaraǵanda, qyryqqa jýyq mamandyq boıynsha jeti myńdaı stýdent bilim alatyn atalǵan iri ýnıversıtettiń materıaldyq-ekonomıkalyq bazasy jańa sıpattaǵy mamandar daıyndaýǵa kedergi jasaýda.
«Atap aıtsaq, birinshiden, qazirgi kezde 70 paıyzy aýyldan kelip oqıtyn stýdentterdiń 40 paıyzǵa jýyǵy ǵana jataqhanamen qamtamasyz etilgen. Aýyldan kelip aqyly bólimderde oqıtyn stýdentterdi jataqhanamen meılinshe qamtamasyz etý - memlekettiń úlken áleýmettik kómegi bolmaq. Bul bolashaq mamandardyń áleýmettik turmysyna aıtarlyqtaı yqpal etip, olardyń sapaly bilim alýyna áser etedi», - dedi O. Asanǵazy.
Bul rette depýtat Elbasynyń bıylǵy jylǵy Joldaýyndaǵy júktegen mindetterge sáıkes Qazaq agrotehnıkalyq ýnıversıtetiniń stýdentterine arnalǵan 592 oryndyq jataqhana salýǵa memlekettik bıýdjetten qarajat bólýdi surady.
«Ekinshiden, Prezıdent Joldaýynda joǵary oqý ornyn bitirgen jastyń birden kásibı maman bolyp ketpeıtindigi aıtyldy. Al onyń bilikti maman deńgeıine saı bilim alýy oqý úrdisin tájirıbelik sabaqtarymen ushtastyrýynda jatyr. Osy turǵydan kelgende, atalǵan ýnıversıtette osyndaı tájirıbelik sabaqtardy ótkizetin óndiristik jáne tájirıbe bazalary joq. Kezinde bolǵan oqý-tájirıbelik bazasynyń jeri qalaǵa ótip jeke turǵyn úılerge berilip ketken. Ýnıversıtetke oqý-tájirıbelik sharýashylyqty uıymdastyrý úshin Aqmola oblysy, Shortandy aýdanyndaǵy A.I. Baraev atyndaǵy Astyq sharýashylyǵy ǵylymı-zertteý ortalyǵynan aýmaǵy 1000 ga jer ýchaskesin bólip, uzaq merzimdi jalǵa berý máselesi oń sheshilse ıgi», - deıdi O. Asanǵazy. Onyń paıymynsha, elimizde «Dıplommen aýylǵa!» baǵdarlamasy qarqyn alyp jatqanda bul máseleni durys sheshpeske bolmaıdy.
«Respýblıkalyq deńgeıdegi Qazaq agrotehnıkalyq ýnıversıteti atyna zaty saı oqý orny bolǵany abzal. Sonda ǵana bilim men kásibı bilikke ıe bolǵan maman aýylǵa oralyp, jumyspen qamtylyp, qoljetimdi baspanaǵa ıe bolady», dedi depýtat.
