Depýtat nashaqorlyqqa qatysty jaýapkershilikti kúsheıtýdi usyndy

Búgin Májiliste esirtki qylmysyna qarsy is-qımyl taqyrybyndaǵy Úkimet saǵatynda depýtat Snejana Imasheva nashaqorlyqqa qatysty jaýapkershilikti kúsheıtýdi usyndy, dep habarlaıdy Kazinform.

«Elimizde esirtkini tek qoǵamdyq oryndarda paıdalanýǵa tyıym salynǵan. 2014 jylǵa deıin medıtsınalyq emes maqsatta esirtkini qoldanǵany úshin ákimshilik jaýapkershilik bolǵan. Bul rette jyl saıyn 2,5 myńǵa jýyq adam jaýapqa tartyldy. Odan keıin jaýapkershilik Qylmystyq kodekske aýysty, biraq esirtkige tyıym salý tek qoǵamdyq oryndarǵa ǵana tarady. Nátıjesinde, bıyl medıtsınalyq emes maqsatta esirtki egip alǵandarǵa qatysty 89 oqıǵa tirkelse, onyń 30-y ǵana sotqa joldanǵan. Degenmen, statıstıka boıynsha elde esirtkige táýeldilik azaıǵany baıqalmaı otyr. Kerisinshe, «qoǵamdyq oryn» degen ýájge baılanysty esirtkige táýeldiler «men esirtkini úıde ǵana paıdalanyp júrmin, bul zańdy!» degen bir sózben jaýapkershilikten ońaı qutylady. Sonymen qatar, bıyl esirtkini medıtsınalyq emes maqsatta alǵan 370 myńǵa jýyq fakti anyqtaldy», - dedi S. Imasheva.

Onyń aıtýynsha, qazir Májiliste «esirtki jáne psıhotropty zattardy medıtsınalyq emes qoldanýdy» ákimshilik quziretke qaıta berýdi usynatyn zań jobasy qaralyp otyr.

«Bul jerde depýtattardyń pikiri ekige jarylyp, keıbiri ákimshilik jaýapkershilik engizýdi usynsa, ekinshi bóligi bárin sol kúıinde qaldyrý kerek ekenin aıtyp jatyr. Zańnama komıteti qoldanystaǵy qylmystyq jaýapkershilikpen qatar, ákimshilik jazany da engizýdi usyndy. Osy rette, qoǵamdyq oryndarda esirtkini medıtsınalyq emes maqsatta qoldaný qylmystyq zańmen, al qalǵan jaǵdaıda (úıde, kólikte, klýbta) ákimshilik tártipte jazalanatyn bolady. Jalpy, osy qadamdar esirtkini medıtsınalyq emes maqsatta paıdalanýǵa tolyq tyıym salýdy qamtamasyz etedi», - dedi depýtat.