Depýtat N. Sabılıanov temekiniń eksporttyq aktsızin alyp tastaýǵa qarsylyq bildirdi
ASTANA. 22 qazan. QazAqparat - Temeki men sharap materıaldarynyń aktsızin tómendetýge eshqandaı bolmaıdy, qaıta kótere túsý kerek.
Búgin Parlament Májilisinde «Qazaqstan Respýblıkasynyń keıbir zańnamalyq aktilerine salyq salý máseleleri boıynsha ózgerister men tolyqtyrýlar engizý týraly» zań jobasynyń tanystyrylymy barysynda depýtat Nurtaı Sabılıanov osylaı málim etti.
Toqtala ketetin jaıt, atalǵan zań jobasy boıynsha sharap materıaldaryna aktsız stavkasyn 20 teńgeden 0-teńgege deıin túsirý kózdelgen bolatyn. «Munyń sebebi ne? Bizdiń sharap shyǵaratyn kásiporyndar básekege qabiletti emes pe? Kerisinshe, buny azaıtpaı, kóbeıtý kerek edi. Soǵan qosa, elimizde shyǵarylǵan temeki buıymdaryna aktsızdi salyqtan bosatýdy qarastyrylǵan. Bul naǵyz sumdyq. Biz kerisinshe, aktsızdi kóterýdi talap etýdemiz. Bul bir jaǵynan bıýdjetke qarjy túsirse, ekinshi jaǵynan azamattarymyzdyń densaýlyǵyn oılaımyz. Alaıda qandaı da bir múddeli toptar elimizde shyǵarylǵan temeki buıymdarynyń eksportyna aktsızdi alyp tastaýdy engizipti. Bul durys emes», - dedi depýtat Nurtaı Sabılıanov.
«Sharap aktsızine kelsek, bizge keletin sharaptarǵa qaraǵanda ımportpen keletinder arzan, óıtkeni olarda aktsız tómen. Sonymen qatar, DSU tabaldyryǵynda turyp biz de osyny úılestirýden ótkizýmiz kerek. Bunda ádeıi jasalyp jatqan eshteńe joq. DSU aıasynda sharap materıaldaryna barlyq elder aktsızi 0 teńge. Al temekige kelsek, biz elimizdiń ishki naryǵyna satýǵa túsetin temeki aktsızin artyrýdy men eki qolymdy kóterip turyp qoldaımyn. Munda másele temekiniń eksporttyq ónimderine qatysty bolyp otyr», - dep jaýap berdi Ekonomıkalyq damý jáne saýda mınıstri Erbolat Dosaev.
Alaıda buǵan depýtat N. Sabılıanov kelispedi. «Bizge sonda basqa halyqtar jaý ma?! Nege biz basqa halyqtardy arzan temekimen ýlaýymyz kerek. Men elimizdegi osy eki kombınatty jaýyp tastasa da ekonomıkaǵa shyǵyn keledi dep sanamaımyn!», - dedi depýtat.
